La batùa dela teda

Matìo Barbéta el ghéa bìo oto fiùi, tri tusi e sinque fémene, ma dó se le ghéa brincà el colera nel quarantoto. I scoltàva, i jerà brài e rispetùsi, for che Piero, l’ultimo, ch’el ghéa on gran bruto caràtare. 

El faséa danàr tuti: scavessòn, tacaìssa, rabiòso, tempéla, slenguassòn, dispetòso e canàja come nissun altro. El poro Matìo e la Catìna, la so fémena, i le ghéa tentà tute, ma con cuél toso no i ghe nava mìa fóra. 
Élo nol sarìa sta gnanca de animo catìvo; no, ma el jera on spìn, on spirito inchièto, libaro, come che se dise.

Daromài i sùi jéra agri de starghe drìo a tute cuéle ch’el conbinava. Solo al vecio Gildo, fradélo de so pora nona, el rivava a darghe ora, parvìa che jera anca l'unico a saérlo ciapàre.

Dopo l’ultima che ghéa conbinà el toso, la Catinéla la zé nà dó nela boteghéta de Gildo, andove ch’el vecio trapolàva ancora col legno, dato ch’el jera sta el marangòn pì brào del paese, bon a far de tuto; man de oro e omo de gran sentiménto. 

Piandendo in denòcio, la Catina lo ga suplicà de inventarse cualcossa par indrissare el so toso, dato che élo sì saéa come tórlo.

Defàti Piero nava volintiéra dò da Gildo; el stava lìve ore nela so botéga a

vardarlo tanbaràre col legno, inmagà da cuélo che sortìva dale man del vecio, dai so sesti calmi e misurà, ch'ij no falàva on colpo. Ogni tanto el lo jutàva e el ghéa caro perderse via a ingasiàre anca élo cualche trapèlo. Lo ciapàva l’odor de rasa, la cola caravéla e doparàre tuti cuij inpristi da marangòn de tute le sorte ch'ij jéra picà via o podà in volta par le scansìe. Jera fursi le uniche ore ch’el toso stava chièto; parte col dorméa. Gildo parlava poco, cuasi gnente, ma cuél poco lassava el segno nel’anima tenpelà de Piero. 

Gildo nol lo rangiàva mìa mai e gnanca nol ghe sbecàva drìo come chij fava tuti ij altri; somejàva che élo saésse védare óltra ala so smània de métarse in mostra fando el sbregamandati.

El dì drìo, cuando che Piero zé rivà in botéga, el vecio lo ciama vissìn e el ghe dise: “Scolta toso, te se ben cuèl che tuti pensa de ti vero?” Piero fa de sì co la testa, anca se ghe paréa destrànio che Gildo ghe parlasse cussìta. “Bon! Lora te capissi anca che no te pùi mia sejtàre óltra, vero? " Piero tase, .. varda par tera, ghe pensa sora, ... prima de fare ancora moto de sì. “Cossa stetu machinàndo lora?” Ghe dise el vecio. “No i  me capìsse” Sbota finalmente el toso. “E mi pò no son mìa bon a tegnerme; a son fato cussìta, a sarò malnàto”.

“Scolta Pìrele” ghe dise Gildo con tacaménto “Vutu farme na grassia a mi? Na specie de zugo?”. “Disime Mistro”  fa el toso tuto roàn dala pìtima. Mistro jera el soranòme de Gildo, on segno de riguardo par la so arte. 

Gildo rusca soto al so bancòn da marangòn, fruà dal laòro e dai carùi, spostando i mucìti de segaùra e rìssoli e tirando fora na vecia casséta de banda piena de ciòi rùdene. Gh’in jera de tute le misure, de grande e de picinini, de fini e de grossi, anca cuìli longhi da covèrto, ch'ij ga d'aver doparà par incrosare Gesù Cristo.

“Ciàpa sta casséta va a inboscarla in tela me teda sora la stala. Cuando che te salta el bào, che te jén da far cualcossa de male, de storto, cùri sujto lìve e tuij su on ciòdo dela misura del bào che te salta e pò inpiantalo in tela batùa della porta dela teda par de rénto, cussìta nissuni te vede ... e co tuta la ràbia che te senti indosso. Ogni sera te jìn qua da mi a contarme de cuanti che te ghin’è incioà.” 

Pieréto ciàpa la casséta, anca contento de essersela cavà cussità a bon marcà zà el se volta svelto par sortìre. Ma Gildo lo sténca diséndoghe: “Spéta, …che te ghe vol anca el martélo justo”.  Lora el vecio el va a ramenàre in tela cassa dij feri, tirando fora un fagòto co la piàntola par bàtere la false.

El deslìga el martélo da false e el ghe lo porta al bocia. “Ciapa toso, dòpara sto chìve par fare i to mistijri.” “Ma Mistro” Dise Piero. “A zé  na fadìga rospa piantar ciòi col martélo da false, … el ga le péne storte e le teste massa fine! “Tasi, canàja e fa cuél ga te go jito!” Sàra Gildo.

La sera drìo Piero va da Gildo a contàrghe che’el gh’inéa inpiantà zà trentasìe, ... de tute le misure.

La sera dopo i jera zà manco: vintisìe!

E cussita in vanti, ... e i ciòi inpiantà deventava sempre manco da on dì in l'altro. Gildo lo ghèa zà capìo dale bote furiose ch'el sentèa calàre.

Fin che on jorno el core dal vecio a dirghe che’l ghéa fruà tuti i ciòi, ... ma che jera anca du jorni che no ghe vegnéa pì el bào d’incioàrghene...

“Brào” Fa Gildo. "A go proprio caro! E la batùa?” Ghe domanda el vecio.

“La batùa? ... La zé cofà on guciaóro; pédo che la corona del crocefisso dela stimàna santa! 
Cossa gònti da fare desso, Mistro?” Dise tuto inboressà el tòso.

“Desso biòn che te li cavi!” Fa serio el vecio, … tirando fòr dal scaféto, con sesti studià, na vecia tenàja méda rùdene e tuta sbecà. 
“Te fé la stessa roba al roverso: te gh'in cavi uno par ogni volta che te ti si bon a no perdàre la passiensa, ... lora te curi in teda e te cavi el ciòdo dela misura drìo al bào che te tratìgni. 

“Ma Mistro...”  Prova a diféndarse el toso. "... A sahì ben che la batùa la zé de làrese e vardè ca go fato na fadiga boja a inpiantàr tuti cuij ciòi con cuél strabéco de martélo ca me ghì petà sù!

Ma l’ocio ciaro del vecio lo ghéva zà sisolà sul nàssare e nol ametéa repliche.

E cussìta i giorni drìo, Piero ghéa tacà a destcioàre la batùa drìo el befél de Gildo, sassinàndose le man dai sforsi, parvìa che cavar ciòi rùdene dal làrese séco, carimìe, ghe zé da spessegàre on pasto, màssima se no te ghé l'inprestio che laóra ben.

Intanto la pora Catìna jera nà da so zio, portandoghe médo conéjo par ringrassiarlo parvìa che ghe paréa proprio ch’el so Piero ghesse tacà a vér pì sentiménto, essare pì chieto e conportarse mejo, tra la maravéja de tuti.

Passa i jorni, fin che na sera Piero rìva dal vecio a contàrghe, tuto contento, che no ghe jera pì ciòi da cavàre e mostràndoghe le man massacrà dala tenàja. Missiòn conpìa!

“Brào” fa Gildo. “A go proprio caro, te te ghe conportà ben! E la batùa? Dime de la batùa” Ghe fràca el vecio.

“Come la batùa? ... Desso ca go cavà i cioi, la zé tornà come vanti!"

“Ditu?” Rebàte el vecio.

“Némo védare lora!” 
Gildo brinca el bocia pal brasso e el lo ména sù in te la teda davanti ala batùa.

La batùa no la ghéa pì gnanca on ciò, ma la jera tuta sbusà sù e anca stciopà chìve e lìve, andòve che jera sta inpiantà i ciòi pì grossi e fùndi. La somejàva on bersaglio da tirassegno de on plotòn de Alpini ciùchi.

“Te pàrela come vanti, Piero? Antevìdi mìa come che la zé ridóta?”

Piero intanto el vardàva par tera, perdendo i oci fra fastùghi de paja, muci de fén, ligàssi de tarlisùni e gròpi del solàro.

“Vitu belo” Fa serio Gildo alsàndoghe la sbéssola col déo e fissandolo drìto in tij oci. “Te pui dàrghe na cortelà a uno e dopo cavàre el cortélo,... ma el sbrégo resta! Par cuanto che te fassi e te domandi scusa, … co te ghe fato l’asenàda, le robe no torna pì come vanti. Cuando ca te barùfi con cualchedùn, te ghe lassi ferìe come cuéste. Biòn pensarghe prima! Biòn trategnérse, téndare alle conseguense de cuélo che te disi e te fé. 
Ma cuésto ocòr farlo vanti,… no dopo che te la ghe conbinà: drìo che'l mastcio zè scapà dal stalóto no jova gnénte saràr la portesèla”

“A go capìo, Mistro!” Dize serio Piero. “Zà piantando i ciòi con cuél trapélo, macàndome tute le man … a ghe machinàvo sora,... e massìma co me ga tocà cavarli con cuèl strafànto de tenàja ca me ghi dà, ... che no la pissigàva gnanca. Me ghévo corto che i busi no i se saràva mìa; par cavàr fora i ciòi a go patìo le péne de l'inferno, ... pì che par fracàrli rénto.

Lora Gildo replica: "De ciòi se gh'in pianta e i t'in inpianta dosso tanti. A cavarli se spéssega on pasto e tuto lassa el bólo,...  gnente torna come vanti. Fursi cuando ch'el legno zé dòvane e mòrbio, i busìti pì pìculi pol anca saràrse sensa màcole, .. ma anca lìve, el ciòdo va cavà in pressa: sùijto!" 

"Ma Vù, .. ca sì vecio, sàvio e tuti ve trata co riguardo, ... come ghìo fato Mistro?"  Rebàte el bòcia bromoso.

"Da dòvane a jero conpagno de ti, canàja. Me ga canbià la menàra. Lora in tel bosco i fava laoràre anca i boce e go sfogà su ràme e bóre tuta la me ràbia rivàndo a sera pì mónto dela Binda e suto de mòche. Vivendo da salbégo, scansà da tuti, pianpianélo a go inparà a rispetàre le piante, la natura e driomàn anca i cristiani, che tanto sémo tutoùno". 

Ma cùi cristiani la zé pì érta caromìo: lìve biòn inparare a pardonàre! 
E ancor vanti biògnaria saérse pardonare ... 
e fursi cuésto zé el sconbatiménto pì grando; a volte no basta na vita a francàrse!" 

Gianni Spagnolo