Don Francesco

Don Francesco  

(Don Francesco Zago, 1922 da Segusìno, pàroco de San Piero)

          Dopo don Emilio, severo e distante, xe rivà lù, grande e forte, i oci ciari e boni, el faciòn radioso. Ne parèa ch’el parlasse de stragno, in prinsìpio, a naltri bòce mai mossi dala vale, abituà al nostro dialèto duro, pissigà fra i confini dei soji.     

El vegnéa dala Val del Piave, Don Francesco, co so sorèla Benedeta e la seicento celestina dai sedili russi che la ne gavarìa menà ala scoperta del mondo tutotorno.

La grande canonica dai solàri che sgrensàva, no jera pì roba par grande, da narghe col capélo in man, ma un posto caro anca par naltri, par i dolse dela Benedetta e tantopì par la sala giochi, soto el buso dei Nicola, verso l’orto andòve che prima becolàva i pai del prete.

          Jera drio canbiare el Mondo e anca la Cesa! La civiltà  de stiàni, coi so riti e le so tradissiòn, nel ben e nel male redità de tante generassiòn de fadìga e de isolamento, ma anca de fede e de coràjo, la stava crolando de bòto  soto i culpi del progresso. Naltri bòce no se rendìvimu serto conto, cressìvimu fra el vecio e el novo, come briscolàndose sule gòndole de fero del simitéro vecio.

          Quante messe, fiorèti e vie crucis; tenpi spensierati in tònega da mòcolo. Le processiòn de primavera, el tarsèto ai capitèi, la benedissiòn dele case e tantopì le rogassiòn …A te fulgore et tempestate…A peste fame et bello.. Libera nos Domine. Capìvimu gnente, ma dopo no vedìvimu l’ora de còrere do par i trodi, saltare le passàje, co la tònega sbotonà, come fùssimu barbastrìji. Col secélo de picolòn e l’acua santa che se spandéa dapartùto, sfidando la maravèja dele veciòte, che le nava contàrghelo ale mame.  Ma el pi belo jera le domèneghe d’istà, co le jornàde longhe, dopo le funsiòn, ….ca no le finiva mai! E naltri a vardàre i raji de sole che ne ciamàva dai finestrùni in sima. Alora lo tintonàvimu par nare in “gita”. Lu  faséa finta de non ver mai tenpo, ma nol jera bon de dirne de no. E alòra via, …a pìe su par le Joe, el Cròiere, sui trodi dei Siròcoli, drento in Val d’Assa. E tuti strucà ne la seicento: rento in Casòto, su par Lastebasse, in Ròsso,….paesi lontani. Fin sul Sumàn: la me prima vera sima de montagna; vojo dire na roba alta e che la ghesse piòvare parte par parte e no solo altipiani datorno.

A jìrimu mòcoli fedeli, chi pì e chi manco, ma anca gran sbregamandati! Boni da bàiti, caretéi, fionde, cortèi e altri bàgoli. Rivàvino in cesa de corsa e tuti suà, schivando i codògni de Toni Campanaro, …che col ciapàva jera dolùri! 

          Co son partìo, ciapà anca mì, come tuta la me rassa, dala maledissiòn dela nostra vale, el me ga regalà on libro:  Don Bosco, co na dedica cà gò par cara.

So nà trovarlo ani dopo, nela canonica de San Luca, in sima ai dossi de Maròstega. L’è sta contento de védarme. Ghemo parlà, …. El me ga oferto castègne e vin novo.

Dopo de alòra no se ghem pì visti. 

          Don Francesco l’è partìo, massa presto, par la so ultima paròchia. Quela pì grande! 

                                                                             Gianni Spagnolo