La cremaliera

LA CREMALIERA

A rivo ale oto
ala stassiòn de Cogòlo,
go trovà altri,
se no gero solo.

Pronta la màchina,
sul vagòn monto,
el capo siga:...
partensa... pronto...

Sbufa la màchina
trema la tera
ecco... uno dise:
la cremaliera.

Come d’incanto
tuti se alsa
el treno va dàsio,
ma par chel trabàlsa.

Ah!... che beléssa!...
che bel panorama!...
par gentilessa,
quel monte come se ciama?

Quel monte, Siòra,
qua poco lontàn
se ciama col nome
de Monte Sumàn.

E questo pì vanti
molto pì in sù?
Quelo, Siòra,
  ze el Monte Paù.

Quelo ze Barco
e là dirimpéto
ghe ze el Priaforà
e pì basso el Coléto.

Passà la Bragònsa,
ghé Tiene e Vicensa
Là Monte Berico
fa bela presensa.

E Mosson, Siòra,
ze questo qua in fondo,
andòve ca sémo,
ze Monterotondo.

Saràr le finestre!...
se va in galerìa!...
che scuro, che note,
che fumo, Gesù Maria!!!

Tuto silénsio,
nissùni arfiàva,
solo la màchina
con forsa sbufàva.

Con calma se sorte
dale galerìe,
e tuti na volta
se ze za in pìe.

Chi varda la Vale,
chi sù pal Costo,
chi palpa el tacuìn
se l’è ancora al so posto.

La Siòra, rimessa
un fià dal sgomento,
la vol savére,
la varda un momento.

Qua riva, Siòra,
la cremaliera
el treno se move
ala bersaliéra…

Qua sémo a Campiélo,
trancuìla, beata,
contra' vissìna
ala Baricàta.

Campiééélo!!! Campiééélo!!!
Fermi… tri minuti…
Beve la màchina
  e bevémo tuti.

(segnalata da Odette)