La morte

Lo savì che le busìe
gà le gambe corte,
digo la verità,
gò sognà la Morte!

La zera scapà 
dal simitéro,
co la false sule spale,
vestìa tuta de nero.

la faséa impressiòn,
co le gambe storte,
e la me gà dito:
"A son vegnù a tòrte!".

Sta roba proprio 
no me la spetàvo,
come na foja,
giuro, tremavo.

A ghe gò dito:
"ma situ sicura?
No sto mia tanto ben,
ma sto fasendo na cura".

Par mi ze rivà
l'ora fatale,
par fortuna i gà inventà
l'ora legale...
che la ga messa
in gran confusiòn
e mi gò profità
de sta situassiòn.

"Varda che la me ora
ormai ze passà
regola l'orolòjo,
e po' se vedarà".

Gavéo el materasso
tuto inbombà...
No so capire...
no gavéo mia sudà!

Augusto Bertoldi

par rìdare e par pensàre...

parole sensa pretese...

grassie a chi le lese.

Gò scrito ste cassàde

par far do sganassàde,

le lesémo in compagnia

par schersàre in alegrìa.

Mai e pò mai gavarìa pensà 

che un'anima bona

le gavarìa publicà...