Lettera ad un amministratore

Al'Ecelentisimo Sior Sindaco dela Vila de San Piero in Val d’Astego,

S-ciava Vostra, Lustrisimo.

Scrivo cuesta mia ala Ecelensa Vostra Lustrisima intel'unica parlata ca so, cuéla inparà co jero ancora on spisaroto gajardo e tegnésto in gran conto, ai tenpi del’Arciduca bonanima, cuando chei me ga rangià sù chive, su sto cantonxelo pena soto la piaseta dei Chéca.

Vardéme invese deso in che stato ca son ridòta. Mi, che co le me do sorele a ghe go da acoa ala contra' par tante generasiòn. I rajona che sìpia cajòn del seco, ma mi no go mia idea, sahìo: a me tremolava tuta la vena cuando chei ga rabaltà su la strada de sora. 

Ga da esar sta i fontanari Vostri, Ecelensa Lustrisima a voltarme l’acoa e torme ogne rajòn de vita. I lo garà fato sensa malisia, vojo ben sperare, ma intanto i me ga xugà l'anima.

A son senpre sta chìve, brava e bona, intel canton dela vecia casa dei Recia, in cao ala roda che core drìo tuta la Roversa. Drìo de mi ghe jera la fontana dela piaséta, che la me paràva do la so acoa dal masapién. Pì in baso la rendola dele Fontanele, che la ga na sortiva pi fonda e pì tanta della mia, che po' la core do pai Giarùni.

A ghin’ho visto pasar tanta de jente, dal me canton, Lustrisimo, sahio! 
Intei tenpi pì visini da mi beveva le vache e el mulo dei Recia, vanti chei emigrase in Merica. Me ricordo de Toni Pituco, chel me ga fato el pontexélo de scalini, tosendo dal mal de mina. Dela Gusta Bota che la rideva su alto cole so comare da far tremare el solaro. Ghe davo l’acoa par l’orto e la Laura Stefanona vegnéa torla invesse pai so fiuri, senpre bei. I Satéla a metar in moja el caliero e a resentar i tapìti, i Oji me doprava par tuto, fa el seciaro de casa. D’istà a tegnèvo in fresca le angurie e d'otuno jutavo a smorbiar védi e vedùi. Cuante lissie co la me acoa! E po’ i tuxiti, tanti, a dugar drio la me roda. I rivàva pantedàndo, tuti roàni, e i me slibava l'acoa cole man a scujero. I dugàva a dighe e barchete drìo la rendola, inbosemandoghe l’acoa al vecio Toldìn e isandolo in bestia. Si, parché la me acoa alora se podéa bévarla, la jera bela fresca e neta, vanti che rivase el progreso.

Drioman i ga batù dò la fontana dela piaseta, par farghe posto ale machine e i ga roto su la strada de sora par le fogne, parando on bon poca dela me vena rento par cuei tubi; po' i ga sfaltà le strade inbosemando i sasi de godròn. Cuel’acoa che vegnéa do tanta e svelta dai soji, dai cògoli dele Anguane, che la filtrava furba fra i sasi, ridota a inbuxarse intele fogne. Che strasio! Drio i me ga cavà el me vecio bocaròlo de saso e intrigà int’on tubo da fogna de cimento. Che dexolasion! Che vergogna!

D’alora el me spisaroto no le sta pì cuel de vanti e la me acoa, spersa chei ghéa la vena, no la jera ganaca pì bona da bévare. I xe rivà parfìn a sarar sù la me rodéta, che la core rente al strodo. Ma ghe jera ancor vita su par cuel salìxo: pasava le fèmene co le robe da lavare, i omeni co carìti e carióle e le s-tciantìse coi tarlisùni sula testa. A no jero mia pì cuela de stiani ma i me tegnéa ancor on fià da conto. Masima i boce, chei noi ghe molava mia mai de briscolarse sul parapeto de sora e dugar col la me poca acoa stropando buxi, fando pose e pociando in volta. I me pisava anca rento, ma mi jera contenta isteso.

Driomàn, pian pianelo, la contra’ se ga bujà cuasi dal tuto, e mi a son restà chìve, sensa nisuna considerasiòn, a trar acoa, come ca go senpre fato. Daromai a pensavo d’averle viste tute e mai garìa ito de subire staltro afronto: chei me tolese l’acoa, cuela stcianta de rìgolo ca ghévo, la me rajon de vita!

Eco, Lustrisimo, stachìve xe la me storia, no so sa son rivà a spiegarme pulito, parvia che a no son mia studià fa l'Ecelensa Vostra. Par Vu magari ste robe xe fregole, ma par mi a xe cuestiòn de vita. Se la Vostra Ecelensa vole, se la pole, la me mole la me acoa, no la staga lasarme avilire in sta maniera chìve.

Vu, Lustrisimo a garì sensa falo tanti afari par la testa e on pasto de carte da tendere, e ponto a no sarì  gnanca pì bon de far le barchete con cuele carte, cuele barchete ca vedevo nar contente do par la me rodéta coi tuxiti a còrerghe drio.

Tòre l’acoa a xe un pecà grande, Lustrisimo! L’acoa la ga da nare sensa castìghi, parvia che cusìta a xe sta stabilìo fin dala creasiòn del mondo.

Tegnìghene da conto Ecelentisimo, molème l’acoa, fème na carità! El Signore ve rendarà merito.

Con devotisimo osechio.

La fontanéla dei Checa.