L'angolo della Poesia

Na volta in tute le case che jera almànco na carioléta,
fursi anca na bicicléta,
ma i tempi i ze passà e tuti desso i ze motorisà...

Se respirava l'aria pura, l'aria fina,
desso invesse se respira gasolio e benzina...

Tuti i gà pressa, tuti immusonà,
na volta co le nostre ganbe sémo sempre i stesso rivà...

Le done le jera vece a quaranta,
desso le par zòvane a otànta...

I boce ai giorni presenti i porta le scarpéte,
stiàni sòcoli e sgalmaréte...

Col fredo se nava a scola de strasse infagotà,
i tusi co la mantelìna de so Pare da Soldà...

Ala tersa basta, i gheva massa studià,
parché che jera le vache da menàre sui prà,
ma con questo no mancava la serenità,
tuti i cantava: nei monte, in campagna, al'osteria,
cussì i se rangiàva a creare alegria...

De sera 'nte le faméje, in te le stale,
ciàcole, barzeléte, discussiòn,
e ancò sémo tuti condissionà dala televisiòn!

Anonima ottantenne+uno