Xé sempre Amore...

Un’ociada, un soriséto, fora de messa…

da quela doménega no la xè più la stessa,

la ricama, la cuse, la par sognare…

dentro de ela s-ciopà xè l’amore!!!

           So pare me dise: - Atenta ala tosa!!!

           Decido mi a chi farla morosa…

           sto toso chi xelo, de bona fameja???

           Se l’è un BACAN, xè na meravéja!!!

Ghè diso ala tosa: - No stà mia sgaràre…

co mi el se sfoga, l’è un rùspio, to pàre!!!

Se de quel toso te sì inamorà,

parecia la dota, te sarè presto sposà!!!

           Cusì gera na volta el smorosàre,

           ma i tempi moderni gà fato cambiare…

           “Se gà voltà el mondo, Santissima Maria,”

            se fusse quà i veci, cusì i disarìa!!!

Adesso l’amore gà na gran libertà...,

ognun fa quelo che più ghè va…

xè tuto permesso, no ghè xè restrissiòn

i se tole, i se mola, na gran confusion!!!

           So pare, so mare, gnente i pol fare...

           xè moderno cusì,  ghè toca tasère…

           no se usa gnanca più maridarse

          se vive insieme,… par bituarse!!!

   Quanta  fadiga  che xè starghe drio…

“A sì proprio veci, gavìu mia capìo??!”

Ma la roba che a n’altri ne stà più a  cuore

xè savére che sempre ghè xè  el vero amore!!!

           Ch’el  sia de na volta, o  ch’el sia de adesso

           l’amore no cambia, xè sempre el stesso…

           el cresse col tempo, el se maùra,

           chi se vol ben no gà mai paura!!!

Cusì, la mente bisogna slargare...,

ma i sani principi, mai molare…

 le robe importanti, tegnerle nel cuore

e dirse, pasiensa... 

“Xè sempre amore!!!”    

Lucia