A Pedescala,
nela grande casa dei Casentini,
ghe gera na bela Farmacia.
Bepiti Spessiàle
saveva trovare rimedio par ogni malatia.
Sui scafài, vasi de vèro de ogni sorte,
con scrito ben quel che ghe gèra dentro…
Anpoline, butiliete, misure, balànse
par fare, come solo lù savèva,
inpachi, siropi, pomate, par curare grandi e picoli:
la gèra proprio na bela Farmacia!
Quel giorno de aprile i gà brusà tuto,
le case nere dal fogo e dal calìsene,
parèa le boche de l’Orco,
quelo che i ne contàva la sera in stala,
par spauràrne…
Anca quela grande casa xè stà tuta brusà…
e la Farmacia, con tuto quelo che la gavèva dentro,
la gà ardesto par giorni e giorni…
El calore del fogo gà fato s-ciopàre el vèro,
i vasi e anca le anpoline se gà desfà
e par tera xè restà un strato de vèro, missià co altre robe,
alto sinquanta schèi, gera tuta na lastra...
Na roba da no credere...
A Pedescala ghe gèra na bela Farmacia,
una de le tante robe
che quel giorno xè stà scancelà….
.jpg)
Dai racconti di mio papà
Lucia Dàmari
30 aprile 2023
Nessun commento:
Posta un commento