El loto

Chìve a contén storie vecie de 150 ani. Lora me ga parésto bon trarle dò intela parlata de stiani che magari mia tuti rivarà a tóre. Fé un sforséto velà; vedarì che pianpianèlo ve sovegnarà qualche stranboto ca ghi sentésto dai pì veci cuando ca jiri ancor bocéte.
Gianni Spagnolo 

A sén bituà pensare che le robe sipia nà senpre cussita, come ca le ghén conoséste naltri e a pensémo che stiàni no se ghesse mai movésto gninte. Lora se demo maraveja coi ne conta che anca alora ghe zé sta i so bei rabaltamìnti in tele usanse dij nostri veci.

Fin ala metà del mileotosento i buschi dela vale soto ai soji i jera ancor tuti patrimonio del comun de Rotso e goérnà da regole vece fal cuco. Se podéa nar par legne, erba, farleto e molar le bestie, ma drìo ai usi sivici e ai tenpi stabilìe; jera roba de tuti e de gnissùni.   

Dopo le disgrassie dela prima metà del secolo, paréa tornà on fià de rèchie; tacava vèdarse pì morbìn e nassere pì creature, ma jera on scanpare ancor gramo e tribolà, la tera da sémena poca e la miseria tanta. 
El Veneto alora el jera soto l’inpero d’Austria-Ungheria; naltri parò no ghìvimu mìa tratamento conpagno de cuili delà dela Tora, a gìrimu cofà na colonia e tendìsti col stciopo. Cualcossa comuncue se movéa istesso. 
Zé sta a cuél tenpo defati che se ga tacà machinàre dal bon de come torghe de volta ala miseria. Diritura i ghéa ingasià via la prima scola comunale obligatoria par tuti i boce, parfìn le tose, fin ala tersa classe; cofà chij fazéa Rentolà fin dai tenpi de Maria Teresa. 
La scola jera in tel portego dij l'Ara, picà via a cavaloti intra le case dij Spagnolo e dij Lorenzi.
Driomàn jera sta tacà fare ópare inportante, ciò; intrà de strade nove e rangiamìnti de cuéle vecie ghe jera pì de on mestiéro inpiantà, màssima cuélo dela Pontara e par destigàre la Singéla. 

Le rive dele Jare a tramontana dela Val del Chéstele le jera cuasi tute sgrébane, solo na stciata manco marogna de cuéle al de cuà e le rivava fin dò in tij pré de l'Astego. Ogni tanto anca la vale rugolava dò, sassinando cuel poco che ghe jera d'inpiantà. El posto paraltro, anca sel jera pì suto de na manda, el sarìa sta belo solivo e bon da frutari, solo che se ghesse podésto cavar via tuti cuij sgaboti e sbessolàre un fià de gualivo par semenare. 

El comune el ghéa da befèl al capitan Marcantogno (Marc'Antonio Lorenzi) de ingasiare i lauri par meterghe man a cuéla parte de marogna, erdéndo vanéde fin soto i soji. Tirapàra jera laoro pai omeni del paese e na sghinséta de speransa in pì par tuti. Eco che lora  cuéle rive i le ghéa ciamà la Vale del Capitano, jera cresésta la tera a disposissiòn e pianpianìti la tacava a dare anca cualche leco in fato de fasui, patate, segala e formentòn, ma pì tardi anca viséle, piri, pumi e fighi. Le vanede in basso le sarìa sta anca comode e bele grandéte, ma le deventava scajéte in sima, con pocognìnte de codego e  biognava spessegare on pasto a portar su l’àcua, el luame e diritura la tera, che ogni stajòn la vegnéa resentà dal'acoa rajòn che soto jera na sassara pedo de na sgossaróla.  Lora vanti con cariole, derli, séce e bigòi; ma tanto stiani a rabatarse i jera bituà tuti. 

El comune pò, par farla conpìa dal tuto, el ghéa fissà de rangiare anca i strodi che menava in montagna su par la Val dela Tora e datarli pal passajo dij barossi, cussita da poder portar dò le bore gualive coi carìti tirà dai muli pitosto che menarle in vale dò pai slìsseghi  cofà che se ghéa senpre fato fin alora. 
Nasseva cussìta la prima vera strada dela Singéla e driomàn el mestiére del cavalaro. Istessamente i se gà insunià de dar fora la montagna, overosìpia i "Beni incolti" ale fameje del paese, seconda a cuanti chij jera e andove chij stava. Eco lora che Scalòn e Tognòn sarìa nà a cuìli dele contrà lìve soto: Costa e Fodati; Tinasso a cuili dela piassa, come anca i buschi dela val dij Mori, Torniero e Dujan e vanti cussita fin oltra ai Luca e ai Baise, cavando el biliéto dal capelo par no farghe torto a gnissuni. 
Ga da essar sta na bela scoperta pal paese; finalmente le fameje, anca cuéle che no ghéa mai bio gninte al sole, le podéa dirse parone de na sghinsa de montagna: "EL LOTO". 
Ben, ..parone se fa par dire, parvia che el contrato chij gavarìa dovesto firmare col comune el parlava de ENFITEUSI.

Cossa éla sta parola che la par na bestéma?

In tanti jera na dal prete a domandare, dato che noi se fidava miamassa de cuélo chij ghe érdeva su i magiorenti del comune. Lora el poro Don Marco, el jera na vardare sui so libri e el ghéva tirà fora sta spiegassion:

L’enfiteusi è un diritto reale su un fondo altrui che attribuisce al titolare (enfiteuta) gli stessi diritti che avrebbe il proprietario (concedente) sui frutti, sul tesoro e sulle utilizzazioni del sottosuolo; il diritto dell’enfiteuta si estende alle accessioni. Sull’enfiteuta gravano fondamentalmente due obblighi: quello di versare un canone periodico (che può consistere sia in una somma di danaro sia in una quantità fissa di prodotti naturali) al concedente e quello di migliorare il fondo. Sono a carico dell’enfiteuta anche le imposte e gli altri pesi che gravano sul fondo, salvo che le leggi speciali o il titolo costitutivo non dispongano diversamente. L’enfiteusi può essere costituita mediante contratto, testamento o usucapione e può essere perpetua o temporanea. Si estingue per il totale perimento del fondo, per la scadenza del termine, per prescrizione a seguito del non uso ventennale e per usucapione da parte dell’enfiteuta del diritto di proprietà . Inoltre, due cause di estinzione peculiari dell’enfiteusi sono, rispettivamente, la devoluzione  e l'affrancazione.

Ah pulito ciò,..  pedo che nar de note! 
Datosi però chel prete se gavéa tolto la briga de spiegarla e che alapedo dopo se podéa far cuelchesevole, jera mejo ciapàre e starsìti; tanto, ..pedo de cussìta.

La féta de montagne da dar fora sarìa sta on pressopoco 1758 canpi, chel comune ghéa spartìo in dozentoun LOTI, prunti par esserghe destinà in contrato co sta enfiteusi ale fameje. Mìa tuti però ghéa bio caro de cuélo che ghe jera tocà par sorte cuando cij ghéa fato l'assegnassion dij loti; in tanti i ghéa storsìo el naso, i rumegava e i se vardava de stralocio. Ma tral vérlo e nol vérlo, meio vérlo, i garà rajonà. 


Cuéla domenega matina de majo del 1865, dopo messa prima, eco che i capifameja de San Piero, e par chi che no podéa, le so fémene o i so parente co la procura,  i jera na su in comune a Rotso, tuti  tirà in potacio, a fare le carte che li gavarìa fati parùni de on toco de montagna. 
Par cualchedùn sarìa sta anca la prima volta chi rivava a goérnar calcossa.

REGNO LOMBARDO VENETO 
PROVINCIA DI VICENZA - DISTRETTO DI ASIAGO

Nell’Ufficio della Deputazione Comunale di Rotzo questo giorno di 
domenica 21 del mese di maggio 1865

Il Signor Toldo Antonio fu Innocente Battistella

La Deputazione Comunale rappresentata dai Deputati Signori:

Spagnolo Domenico, Comparin Domenico, Gianesini Giovanni, ….

Ma cuél jorno no nasseva mìa sol chel LOTO, ghe jera n'altra parola nova da scrivere nel dissionario paesàn: el PREVIALE (servitù prediale), overosìpia el fìto che biognava pagare ogni ano par mantegnere el derito. Da alora in vanti chi che pagava el previale sarìa sta el paròn. Defati se ga da capire che dopo on puchi de ani cuìj loti i ga tacà a spartirse a fetéle fra i fiui e i altri réde e vegnér senpre pì picùli driomàn che paràva le fameje. Vardé vero che le spartissiòn no se faséva mìa nando dal nodaro, fasendo carte e spendendo i schèi che no se ghéa; no, majinarse! Se spartiva la roba ala bona, sula parola, alevolte ciamando el prete a far da testimonio. Lora presenpio, chi che pagava el prediale pal loto del poro nono, drìo el ghéva da nar in volta dai parente a far coléta. Alevolte jera anca na catura, datosi che anca lora se jera fradèi cortéi.  
Saér ben tuti i confini da lora in vanti jera deventà na esigensa de tuti e biognava stanparseli pulito in testa. Guai sbaliarse a trar dò na pianta o far farleto su cuél dij altri! Jera la miseria a farla ancora da parona cuando che anca on brassò de erba, na frasca de noselaro o on tarlisòn de farleto el ghéa el so bel rimarco.

El documento intiero ca publichemo chive rénte, cussita se vulì ve lo lesì pulito, ne lo ga messo a disposissiòn Mario Pesavento Crosato e zé cuélo intestà a Toldo Antonio fu Innocente Battistella. 

(Sa no m'inbrojo el dovarìa essare sta so poro nono dela Maria Contessina, tanto par capirse)

Vardè ciò cuante informassiòn che se rivarìa a rincurare solo da un documento del genere, anca se l’è on contrato a stanpa. A garìa caro se saltasse fora dai scafìti dele case tante altre carte come stachìve, andò che ghe zé scriti anca i veci soranome dele fameje. 
Sto loto, presenpio,  l’é intéla Val del Torniero e el confina: a levante con cuélo de Fontana Antonio di Gio.Ottavio e Luca Luca fu Francesco, a medojorno con cuélo de Sartori Catterina Ghia  (che sarìa me bisnona, varatì) e Gianesini Giovanni fu Gio.Batta Checca, a ponente con Sartori Napoleone Giuseppe fu Giovanni, a tramontana con Sartori Antonio fu Antonio Menegante. 

Chìve lora podarissimu risponderghe a cuìli chij ghéa domandà dandòve che jén el nome dela contrà dij Chéca (le Fontanele, desso Via Martiri 1848). Chéca jera ponto el soranome dele fameje Gianesini che stava lìve. El nome tradissionale de batédo dij Gianesini jera senpre stà Francesco (Chéco) e in contrà jera rivà a esserghene pì de uno con cuél nome; eco lora chij disèa "dò dai Chéca" par ciamare la contrà. Ma se conta anca chel posto se ciamasse cussìta ancor prima che rivasse i Gianesini, pararia da Gallio, nel XVI° secolo e lora sarìa sta ìli a vantàr el nome.
L'ultimo de cuéla rassa, par chi che se ricorda, zé sta Tita Mondo, famoso fra i boce de alora par esser rùspio cofà na lengoa de vaca e pì roverso d'on calséto.