Mìa sèmo, ciò!

Intun paeseto sperso su par na vale spersa, ghe jera la gente del'ostaria che la se perdéa via a tenpelare Titela chel jera tolto pal tontolon del paese. Stochìve el jera on poro gramo chel se rabatava fasendo laoriti e nando par elemosina. 

Co Titela rivava a l'ostaria par scrocare on goto, i òmeni live i se godéa on pasto a farghe insèrnere fra on scheo da diese, na palanca da sento e na carta da mile franchi messe live in bela mostra sula tola. Titela, dopo verghe pensà sora on poco, el toléa senpre su la moneda invesse dela carta da mile. Lora tuti i partiva a conpatirlo, strucandose de ocio on co l'altro e dandoghe pache sule spale. Ma Titela a nol ghe badava mìa tanto;  élo el nava de boto a torse on goto co cuele do palanche.

On dì capita al'ostaria un foresto chel ghe da mente a sta jente che la cojonava Titela. Titela, poareto, el ghe fasea pecà a essar tolto cussita de berta profitando dela so condission. Lora, dopo che cuel poro gramo el ghea comandà el solito gotarelo, el se lo ciama in parte el ghe spiega  pianpianelo che a xe ben vero che du schei de fero i xe de pì de na carta sola, ma che la carta da sola la val tanto de pì dela moneda de fero messa insieme.

Titela el poda do el goto vodo, el lo varda drito intj oci e el ghe dise: Sior, a lo so ben, a no son mia semo dal tuto. La carta da mile la vale otosentonovanta franchi de pì dela moneda,  ma el dì ca torò su cuela carta da mile cuj pori loli i ghe molarà de far sto xughéto insulso e mi a no vinsarò pì i me sentodiese franchi par man.

Sto fato el finisse chive, ma no vanti de verne insegnà  cualcossa:

• Chi che someja semo, mia senpre el lo xe dal bon;
• Cuj che pensa de essare i pi furbi, capita chei sipia  i pì saladi;
• Chi che ga massa anbissiòn, el ristcia de perdere i schei puchi ma sicuri.

Ma la lession pi bela ca podemo cavare da sta storieta  a xe che cuel che inporta a no xe mia cuel chj altri pensa de ti, ma cuelo che ti te pinsi de ti medesimo. Parvia chel furbo vero a no xe mia cuelo chel pensa de essarlo, ma cuelo chel lo mostra coi fati.