El bàito (postripropost)

【Gianni Spagnolo © 21L28】

La passion pal bàito la ne ciapàva de bòto, fa un mal de stajòn. A no se podèa scapàrghe! Pèna che tacàva a butàr la foja e a stenprarse l’aria, bisognava xa pensare a far bàiti. Par la disperassiòn dele nostre mame. Ma éle a no le podéa mia capire, stachìve a no jera roba da fèmene.

Magari assì drio pensare che sìpia na cuestiòn insulsa. Maginàrse! A jera el mestiero pì serio de alora. Serto no l’unico; .. ghe jera anca le bande, le bestie, le fionde, i gnari, el vistcio e tanti altri trapelaminti, …. ma el bàito el ghea on posto tùto speciale. A che fare, pò, par che no lo sàpia nissuni. Desso magari i savarìa spiegarvelo con paroloni grossi e rajòn pissicologiche. Ma mi me par chel bàgolo sia ben ciaro: se fusse péna vera sta fòla dela evolussiòn dela specie, cossa vulìo che ne ghesse lassà intel sangue cuela processiòn sensa fine de boschjri ca ghìvino ale spale? Bituà a stare d’istà intj bàiti in montagna, a chipàrse munti su stramassi de daxe o de foje de fagàro, ociando le stéele tra frasche e foje, saendo de rasa, de mustcio e de téra, sentendo cantare montagnole, gòdele, sidrùni e l’àcoa dò in te la vale?  A jera pì che lojico ca ghìssino passiòn pai baiti, i menaròti, i lòti, i usèi, le bestie salbéghe e la vita a l’aria libera. Cossa gavarìsselo dovesto piàserne? Le nave?  Jera mia colpa nostra sa jirimu cussìta, …..jera la ciàma dela nostra rassa.

Fatostà che xa la matìna a scola se tacàva a figurarse el bàito: andòve, come e con chi farlo. Prima ocoréva governar la banda, parvìa chel bàito jera el forte dela banda. A se sbrojavimu in pressa, dato che la banda ghe jera xa; par sù o par dò sempre la solita!  A jera pì un castigo  decidere chi che fasea el capo. Andòve e come, invesse, jera un bel rovèjo. A ghe jera diferente posti andòve nar a far  bàito, dipendeva dal tempo, dala voja e dal bao del capo. Par lo pì su par le Jare, par la Joa , ale Rive, su pal Chéstele o su par la val de l’Orco. 

Manco fàssile invesse jera procurarse el materiale da òpara.

Alòra, a  San Piero, on te pudìvi anca copàrlo, ma guai a tajarghe anca solo na ràma sul suo. Pecà mortale! Segnà a dèo. Scométo che i veci boschjri dala piassa i gavarìa sentìo cascar na pianta de strosso in montagna anca sòto i bonbardaminti.  Mia finìa, … bisognava star tenti a tuto, tegner dacònto on mucio de befè! Fagàro e càrpane no, parché legno da fògo. Pissi e làrexe no gh’in parlemo, cajòn chi xe da òpara. Orni gnanca, parvìa de branchi e màneghi. Egani e cassie no, i xe bòni da pali. Noselàri guai, parvìa dele frasche pai fasolàri. Bagolàri gnanca, parvìa che i xera doparà un fià par tuto, Stropàri…lo dise de suo. Albari da frùto: sacri! Pestar l’erba: maledissiòn! 

No ne restava che i vixùni, ma cuili a noi jera boni da gnente.

Ansi no: qualche inteligensa tocà la ghea pensà anca de fumarli.

Ma ghe volèa ben altro a tegnèrne! A tajàvinu  basso a livèlo raìxa, coverdendo i taji cussì ben che gnanca la pianta s’inacordèva d’esser stà tocà. Gavìvinu le vedéte, na bona sàta e anca crèn. Paraltro ghe jera sassi dapartuto e anca quelo jutàva a far la base a sercio e un fià de masiéra, rincurando le frasche. A bàito finìo a jèrimu tuti contenti. Drento se sentìvinu al cuèrto  e parùni del mondo. Capitava parò che altre bande de snebelùni, parvìa ca xìrimu sempre in guera con tuti, catàsse el nostro bàito o naltri cuili de ìli e alora… se fasèa tabàco.

El mejo posto pal bàito par mi, a jera sòto el sasso de le Jare, pèna sòra la fassa de nosèlari in sima ala riva dei Badùni. Posto sconto e stratejico, vissìn casa, vista strada e con quel tocàsso de sojo chel fasèa da muro, i sassi datòrno e un bel boschèto de nosèlari chj fava onbra. El jera un bàito naturale. Na fortessa!

Là zugàvino contenti a guèra, a indiani  e cauboi, (ma mi gò sempre tegnù par j indiani) a far Zorro. A tirarse frece, lance, pìroli e fiondà. A onfegàre de scondòn le bachéte col vistcio pai uséi, a inventàr tràpole, far sigoloti, a studiare tute le mòche inmaginabile. 

Co xè vegnù dò el sasso dal sojo, fin sora le case dei Mori e chj gà fato i sbancamìnti pai murajùni nuvi, anca quel posto caro l’è sta ingiutìo par senpre! Ma già lora a nissùni ghe passava pì pal servèlo de nar in volta a far bàiti.

Intanto la Montagna la tornava dàsio a torse la roba sua. I strodi e le vanéde, le masiére e le scaléte, i rùdari dei bàiti, le passàje, i ponte e i prà. Robìne, spini, mustcio, visùni e ortìghe i fava òpara de misericordia coverdendo tuto. Visèle, peràri, pomàri e figàri, na volta tendù col stciopo dale mire dei bòce, i se consumava in silensio no dando pì fruto. Tuta roba che i nostri veci i ghe gavèa tòlto in prìstio co riguardo in secoli de laòro e de fadìga granda. La Montagna jera dacòrdo, cajòn che la ghea caro tegnère in gaja tanta vita, come ogni cara mama. Ma desso el pato xe ròto: xe giusto che paròmo ghe torne el suo.

A vardo el menarotèlo che me ghea regalà me ‘opà; a l’è on fià rùdene e ocorarìa governarghe el filo e anca el mànego,  ma no càto mai el conto. A me fiòlo no posso passàrghelo: no xe pì i tenpi. Anca sa vedo che ghe piaxe spacàre sòche, far dò bastuni e trapolare….. e alora m’ingropo. Fursi on dì o l’altro a narò a sepelirlo, el me menarotélo. 

Come chej i indiani  soteràva l’assia de guera. La guera xe finìa: a ghemo perso! A xe sparìe i bisonte, la prateria, le cacce e le cavalcàde intel vento. 

A xe rivà l’omo bianco e i ne ga messo intele riserve.

Daromài a semo tuti intele riserve!