La traversa dela Nòna

La prima funsiòn dela travèrsa xera quela de covèrsere i vestiti de soto par no sporcarli, ma la faséa anca da guanto par ciapàre le técie che scotava, dala stua o dal fogo o par tirar fora la fugàssa dal forno par métarla sula finestra che la se arsòre.

La travérsa la xera miracolosa par sugàre le làgrime ai tusìti e, serte volte, par netàrghe el naso o el muséto onto. 'ntel punàro la travèrsa la serviva par portare fora i uvi o, quando tocava, i pulsìni.

Quando che rivàva in casa qualche Forèsto la travérsa la vegnèva bona par scòndere i tusìti timidi o paurosi, gnaro de conforto e sicuréssa.

Al'ocorénsa se ghe xera da fare un scapòn in corte col fredo, la Nòna la se imbacucàva i brassi co la traversa. E se pioveva e che xera da paràr sù le galìne... na corsa in freta coverséndose la testa co la travérsa che dopo magari la vegneva sbatù sora le bronse del camin par far ripartire el fogo al posto del supiaòro. Ghe xera da nare a tore le patate in càneva? Co la traversa! La legna seca? Co la traversa! E in orto? Co la traversa! Par tor sù, co xera ora, le teghe, i bisi, le verse, i sucùi, quatro pérseghi nel persegàro, quatro brancà de sierése o qualche pomo petà dal pomàro, qualche figo dal figàro... che pressiòsa quela traversa! E se ghe xera qualche velo de polvere sula credénsa o i viri arnibià... un colpo de traversa e tuto netà. Co xera ora de mesodì, la Nona la nava in corte e la sbatéva la traversa, cussì i òmini i capiva che xera pronto in tola.

E... bau sete! El Toséto el spuntava fora ridendo dala travérsa... 'ntela scarséla la gheva el gemo de lana e tacà su l'òro qualche gùcia de sicuressa e magari na medajéta dela madòna benedìa.

Ah che dolcessa butarme da toseta in gaia de me Nona, magari a fregarghe el posto ala gata...

Le so man le me caressàva la testa e mi sentivo el profumo dei so laùri de cusìna: siòla, ajo, penne de polàstro, parsìmolo, aséo, smarìn, salvia, farina, salàdo, formajo... el profumo dela me casa.

La gaja de me Nòna xera el me gnaro.