Pensieri

Sora i me oci…

 sora la me testa, 

sora tuto de mi…

In sto sòfego, co sto caldo de sto giorno de istà

son drio provare a riposare tuto de mi…:

el me corpo, la me mente,

fin a rivàre in fondo a la me anima…

rami de pésso de un verde cusì belo

che i slùsega tra i ragi del sole,

profumo de rasa che me impiena i polmoni,

 un tocatélo de cielo celeste ciaro,

sprussà  de nuvole bianche….

I  uselìti che passa de ramo in ramo

e i me regala na melodia sensa confronto…

 le cioche  dele vache che pascola sul campigolo… 

musica par le rece… 

le formìghe che le soméja mate,

le va, avanti e indrio dal formigàro 

con na pressa ca no capìsso…

El sofio legéro del vento che me caréssa la pele,

e i fiuri, vignù fora dal penélo de un gran pitòre,

i me fa corona intorno 

e me sento parte de un quadro sensa paragòn…

Saro i oci e scolto…: 

sbechi, ridàde e ciàcole de gente

che xè vignù quassù 

par ciapàre un poca de aria fresca,

 l’aria bona dele nostre montagne…

Me destàco da tuto, 

sento solo el me respiro,

 me also da tera e volo…

E fra tute ste robe mi, da sola, 

lontan da i me pensieri,

parte de stò universo che

a dispeto de tuto continua a nare vanti,

come na giostra el gira e nol se ferma mai…

Mi, cusì picola,  son solo un puntin, 

ma me sento grande... me sento viva,

e son contenta de quel ca son,

parchè son sempre bona a trovare la beléssa

nele pìcole robe, in quele semplici,

in quele che tuti i giorni gavémo intorno,

ma che de spesso no semo boni de védare,

 no semo boni de vardàre…

Intorno a mi, tuto xè meravéja, 

fra le  tante miserie del mondo,

 la vita me regala scampoli de meravéja!

Son contenta de far parte de sto dipinto, 

de sto quadro veramente speciale!

Con un fil de vosse ghè diso…: 

grassie a DIO…

par tuto quelo ch’el me gà dà, 

che ogni dì el me fa vivere

 e par quelo ch’el volarà ancora darme!

 CAMPOLONGO LUGLIO 2006
Lucia Marangoni