La roba paj cuniji

Co rivàva l'otùno, tute le faméje che ghéa lóti  i nava a legne e i molàva dò le stanghe par la vale par strosàrle po' fin fora al ponte. Cussìta jera pì comodo che menàrle fin fóra in tela strada e no coréa gnanca ciamàre cualchedùn col cavalo o col tratòre.

Le fassìne invesse, cuìli che no ghéa comodo el filo, biognava ch'ij le portasse fór sula strada e ben ligà e inpilà  par podére nar tórle pì vanti col caréto a man. 

Se faséa cussita da senpre; ogni faméja ghéa la so posta par le fassìne anca se no i ghéa el lóto che confinava co la strada. Nissùni (beh, no zé mia proprio vero, ale volte cualchedùn sbaliava mucio a cargàre) se ghéa mai sognà de robàre le fassìne; tuti rispetava el befél.
Jera da on poche de stajòn parò, che ghèa tacà a sparire cualche fassìna; senpre de pì, manaman che passava el tenpo. Sùjto la jente ghèa tacà incolpare cuesto e cuélo, de vardàrse de stralòcio, de cagnàrse. 
Cuando parò che Jinéto dala Canpagna, che ultimamente el ghéa ciapà el léco de nar in volta  a lolòn par la montagna, el se ghèa scònto a farghe la posta e visto el ladro, lora i parùni dele fassìne i se ghéa catà par tor providimìnti. 

Cuél che cibuscàva le fassine jera Pierìn dela Togna, un sbregamandati sensa arte né parte ch'el faséa la bela vita coi schéi de so póri nòni. Piero el jera orfano de tutidù e 'l jera sta arlevà dai noni, ch'ij ghe dava tuti i contenti. Cussìta el jera vegnù sù sensa regole, restà da maridare e un scavessòn de prima.
Morti che zé sta i veci, Piero ghéa vendù fora la casa e 'l se ghéa ridòto a stare in téla teda in medo a galine cunìji can e gati, cofà on rangotàn; el ghéa anca tacà bévare.

Coi schéi dela casa in piassa, el ghèa ciapà a fadiga la patente e conprà na vecia Renò cuatro verdolina e gh'in jera restà albisogno par mantegnerse sensa laorare. 
la Renò el la doparava par far de tuto, el portava in volta le bestie, el ghe dorméa rento col jera massa ciuco par guidare e no la jera serto benmessa. 
El vìssio po' de rancurare la roba desmentegà in volta, el lo ghéa senpre bìo.

Eco lora che cuando i paruni dele fassìne se ga catà par decidere, zé vegnù for de tuto: insachèmolo de bote, .. spachèmoghe la màchina cussìta el ghe mola de nar in volta a robare, .. e altra roba del genare che se pol imaginare. 
Zé sta i pì veci a calmare i animi e a dire che biòn far le robe drìo la leje; no tor inissiative che dopo se se podarìa ciamàrse pentìe. 
Anca parvìa che, a ben védare, Pierin el jera sì un candalporco, ma anca on gran finco e  sinpatico,... col jera in vena; e po' nol ghe ghéa mai fato del male a nissuni.

Lora i ga deciso de dìrghelo al marassiàlo dela Forestale; ch'ij fusse luri a farghe ciapàre on spaurasso. Chissà che nol se revéde!
Ben informà del fato, la Forestale ingàsia on pichéto andove che jén dò la strada dij lóti, dopo vérghe da mente che l'omo jera na sù co la machina. 
Paraltro el Piero i lo conosséa anca ìli e i saèa ben da ghe ganba ch'el nava sòto.

Verso le cuatro, eco Piero ch'el jèn do sigolàndo col brasso for dal finestrin, la baréta sule ventitré e la so solita aria da slondròn. 

Col vede el marassiàlo in medo la strada, Piero inciòa de boto, faséndo rasàre le rùe sul jarìn.

"Cossa ghélo, capo?" fa Pierìn al marassiàlo. "Galo ciapà fogo da cualche parte?" el ghe dise co la so facia da stciafùni.

"Solo un controllo Piero, ... solo un controllo. Dai, ...facci vedere cosa stai trasportando, scendi e apri il bagagliaio!" Fa il milite serio. Piero smonta come se gnente fusse, sijtando a fistciare e el vérde la porteséla dedrìo. Coverte da on tarlisòn tuto slìndese e sinsolà, ghe jera sinque bele fassìne de fagàro ben fracà.
"E queste cosa sono" Fa sorniòn el forestale. 

"Come cossa éle? Zé roba pai cunìji marassiàlo, ca go rincurà drio la strada; no zé mia proibìo vero?" "Ah, bravo Piero!" Rebàte el militare. "E vorresti darmi da intendere che questa roba qui è cibo per i conigli?" 

"Secapìsse capo!" fa serio Pierìn. "Morìsse chive da on colpo sa ghe conto balòte." 
"Attento Piero" Fa calmo el forestale "Che qui, oltre al furto, contestiamo anche la falsa testimonianza e il vilipendio di pubblico ufficiale. E poi, ... secondo te, i conigli mangerebbero questa roba?"  Dise el marassiàlo sercando de star serio. 

"Altroché, capo! No la zé mìa sporcarìa" Rebàte deciso Pierìn. 
"Piero, Piero,... dai smettila di fare lo sciocco che qui altrimenti finisce male"  El tenta de redimerlo el sotuficiale.

Pierìn no se perde de animo, .. el ghe va davanti al marassiàlo baténdoghe col roverso del déo sul botòn dela jachéta e vardàndolo drito in tele bale dij oci e el ghe dise: 

"El staga tento comandante: mi la roba a ghéla dào, ... po' ... se i cuniji vol magnarla, ... bona, ... sonò a la trarò in tel fogo!"