Le carte

Anacleto e la Bepìna i stava nela contra' pì alta del paese.

Da cuando che Cleto jera in pensiòn, i se movéa poco (no sahìo, che vanti i fusse nà tanto pì in volta). I tendéa le do vache, le viséle e l'órto e l'unico diversivo jera coi nava in césa o al véndre, coi nava dò in màchina a Piovene al marcà.

Ghe bastava de védare jente e jirare tra i banchìti, cussìta i perdéa l'oca e i vedéa come che nava el mondo.

La Bepìna la jera on duce, comandava éla in tuto e el poro Cleto el se datàva, anca parvìa che ghe faséa comodo. L'unica roba che la Bepìna no jera bona, jera de guidare la màchina. Lora Cleto el se sentiva lù el paròn; ma la fémena no la perdéa ocasiòn de sejtàre a criticarlo. O parvìa ch'el nava massa forte, o parché el stava massa rénte el muro, o parché nol stava sténco sul manubrio.

Anacleto el ghéa ciapà tardi la patente, par no stare massa isolà là in sima, ma el guidava gran póco e no ch'el fusse gnanca massa franco co cuél trapélo de basinèla. Defàti el ghéa na vecia NSU Prinz color sàbia del deserto (cussìta jera scrito sul libreto), conprà de tersa man da so poro conpàr Berto. Col rivàva in paese el se faséa sentire sùjto, parvìa che vanti canbiar marcia el ristciava de brusàre el motore; defàti el jera na stciantìna dò de récia.

On vendre matìna i du spusìti se parécia par nar dò al marcà. Cleto in cravatìn, capélo e jachéta de fustagno, la Bepìna in telarina pevre-sale, scarpe de vernise e borsa d'ordinansa. La fémena se posta sul sedile davanti, a schéna érta come on alpìn e co le do man strente béle fisse sula borsa che la tegnéa in gaja, brincà cofà na poja su na rama.

Cleto jera solito far la pontara fin dò ala provinciale in fole, cussìta el tegnéa da conto la benzina; ma ghe jera ben i freni ch'ij criàva osàna.

Zà in Barcarola la Bepina taca co la solita solfa: "Sta drito, .... tirte sù el capélo, ... me par che te vai massa forte, ... sta tento a querlìve davanti, ..sòneghe!" ... E via cussìta. 
Cleto taséa, tanto el jera bituà.

Sul stradòn novo de Cogòlo, Cleto ogni tanto se godéa a fare invelenàre la sposa tacàndo darghe gas ala Prinz.

La Bepìna lora la scumissiava a nar for de caséta: mòleghe desgrassià, ... te vui farme morire, ... no te ghe sentimento... Frena!  E zò sbéchi. 
Ma i se godéa anca, co ste semàde.

Eco che, rivà ale Basse, el vede pì vanti na camionèta dij Carbinijri ferma coi du benemeriti ch'ij tendéa la strada.

La Bepina li vede par prima e la sbéca: "Siagurato! Te ghévo dito che te curìvi cofà on mato; Signorebenedéto cossa fémo desso!"

Al vedàre la paletéla, Anacleto inciòa de boto che cuasi la Bepìna se smalta sul véro, la machina singiòtola e 'l mete for la frecia, intanto che la dona séjta a sigàre. "Tasi fèmena, ... mòleghe, ... so mi cossa fare!" Siga anca Cleto, tuto roàn dal boresso.

La Prinz se ferma in costa e riva vissìn l'apuntato. Intanto ch'el Cleto, suàndo soto el capélo, para torno la manéta par sbassàre el véro, la Bepina séjta: "Cossa voràlo cuerlì desso, ... te vedarè, ... te vedarè. Mariasantissima juténe Vù!"

"Patente e libretto!" Dise el zòvane militare, dopo vérse portà sguelto du dìe sul frontìn. 
La Bepìna, sul sedile vissìn no la ga sentìo gnente e la ghe dà de gùmio a so marìo disendo forte: "Cossa vòrlo Cleto..., cossa vorlo cuél live?"  "Tasi Pina, tasi, ... mòleghe,... el vol solo le carte!" Ghe risponde l'omo tuto stissà. 
"Ahh, bruto mastcio" fa la Bepina schifà, tirandose sguelta indrìo sul sentàcolo e parando la boca sora el naso. 
"Dighe ch'el léche so mare!".