Le statuéte

Fra tuta la tépa dela Piassa, el pì scavessòn e sbregamandati jera Bertìn dela Jijéta.

Nol ghéa riguardo par nissùn, ... el jera inventore, artista, lìbaro pensatore e gran fiol d'on can. Cussìta renitente ala dissiplina che nol ghéa fato raisa gnanca nei Balila. 
Na sgresenda par la scola, la società e la so fameja.

Brao come élo a inventarse zughi nuvi, schersi, tòlte de berta e móche no gh'in jera altri.

Ala fine de setenbre,  le vache péna scargà da montagna le vegnéa molà for paj prà a rumegàre l'ultima ardìva e la strada dela Capéla jera tuta inbosemà de boasse dele bestie che le tornava in stala e che no ghe paréa vero de farla for dal socàle godéndose i ultimi jorni de ferie.

Jera sere ancora caldéte e la jente che piaséa star fora doposéna a gòdersla on poco.

Na sera, Bertìn se ghéa inventà n'altro dij so zughi stranbi e 'l jera incucià rénte la boassa pì grossa ch'el ghéa catà a rumàre la materia con on bachéto.

Capita che rénte lìve passe el Dotore co la moto, ch'el tornava da na visita in Belàsio, ... el vede el bocia el se ferma e el ghe fa: "Ma cossa fetu benedéto, ... non va micca bene giocare con la cacca, ... la zé piena de germi. Ma cos'é che stai facendo?"  "A son drìo ingasiàr via na statuéta co la merda" risponde Bertìn tranquilo. "Ah,..." fa el dotore... "Ma dime,... e chi vorìssitu rapresentare?" El rebàte curioso. " A son drìo far la stauéta del Dotore" dise serafico el toso.

"Valà sanbélo,... se no te ghe altro!" Fa el medico dàndoghe gas ala moto e sejtàndo verso la Piassa.

Driomàn passa anca Jenio, de ritorno dal simitéro e el ghe fa supardò la stessa domanda. "A scolpisso la statua del Casolìn! fa serio el bocia, inmuciando ancor pì merda col bachéto e stciafandola pulìto. Jenio scorla la testa e el sejta par la so strada, batendose el sono co la ponta del dèo.

Intanto riva el Farmacista da Arsiero co la so balìla e ghe toca fermarse par no ciapàr soto el toso. El sbassa el finestrìn e el se informa de cossa che zé drio a conbinare cuél savàjo de bocia.

Bertìn ghe spiega con passiensa che 'el sta faséndo le statuéte dela gente pì inportante del paese e che cuéla che l'è drìo inbastire desso jera ponto cuéla del Farmacista.

Da lì on poco riva anca el Maestro, ch'el jera péna stà dò da Basso a catàre cuéla so vecia morosa che nol se decidéa mai a maridare.
"Umberto! ... Siagurato! Ma non ti vergogni, ... spetta che lo sappia to mama, pora dona. Ma cossa è che stai facendo con cuello schiffo?

Saésto che l'è drio fare la statua del Maestro, el célera el passo tuto stissà, disendoghe che i cunti i li gavarìa fati poco drìo, péna che tacava la scola.

Sta jente che vegnéa sù dala Capéla, la se ghéa fermà a far do ciàcole in Piassa a l'Apalto, prima de nar casa. Ghe jera el Farmacista, el Dotore, Jenio e da ultimo se ghéa dontà anca el Maestro.

Tirapara, ... l'argomento dele ciàcole jera deventà el toso che dò par la Capéla el scolpiva co la merda le statuéte dele persone pì in vista del paese.

A on serto ponto, a cuéla còngrega se donta anca el Podestà, ch'el stava slongando le récie dala tola lì rénte andove ch'el dugàva a foràcio col becàro e cussìta el se fa spiegare ben tuta la storia.

Tra na ridàda e l'altra, eco ch'el Podestà decide che zé mejo nar controlar de persona cossa che conbinava cuél bocia. Sessamai!

Fando finta de gnente e sigolando, el Podestà el s'invia dò par la strada co le man in scarséla, fin ch'el riva rénte a Bertìn tuto inpegnà nel so laóro co la lenguéta fóra e col bachetélo ch'el lissiava pulito la so nova ultima òpara; la pì grossa.

Li datòrno faséa bela mostra (se fa par dire) cuéle cuatro o sinque statuéte ch'el ghéa già finìo.

"E bravo il nostro Berto" fa l'Autorità con vosse studià, giràndoghe tórno.

"Volemo fare i artisti ah! ... A scométo na palanca ca indovino chi che te si drio scolpire".

"SCOMETEMO!" risponde imediato el bocia.

"Eh, eh, ... caromio: ... a vedo che te ste penelando el mucio pì grosso, ... lora ti si drìo de sicuro a fare el Podestà".

"... Mmmmhh" fa el toso scorlando la testa con fare stomegà.

"Me despiase sàlo, ... sballiato in pieno! ... A no go mia merda albisogno. 
Cuà la palanca!"