Bosco brusà

 

Brusà da poco amiche man,

sen chi a puntar in ciel

i nostri rami sechi.

El fogo el se magnava

in freta l’erba seca,

corendo a perdifià

su par le piante grosse.

Un poco lo iutava

a corer un po’ più in freta

el vento de la sera

ch’el sé rampegava,

svelto verso la veta.

Na serpentina de fogo,

con s-ciantisi

che in costa al monte

de lontan se vede.

Con in sima ale ardenti

e sfavilanti fiame,

un capel fumigante,

de bianco e grigio porta.

Le foie se pasiva,

par po’ brusare in freta.

I rami contorsendose

de fogo , i s,ciopetava tuti

par in fin cascar de soto,

in bronse incandensie.

No canta pì i usei ,

i xé scapá lontan

voladi tuti via

par no brusar le pene.

No vola pì farfale,

le gà brusà le ale,

le gà lassà al so posto

del fumo che vola via.

Lusertole e orbesine

scapà dale so tane

le xé restá tute,

finie brustolie.

Vipare e carbonassi

strisciando a pì non posso

provava anca luri,

dal rogo a scapar via.

Sghirati che coreva

e che girava in tondo

col fogo su la coa

che no ghe dava scampo.

Saltavan quasi in gara

le rane e i rospi grossi

ma l’acqua che i sercava,

vaporisa dal fogo,

la xe volada via.

I fiuri se passiva

e se piegava xo

cedendo le corole

di fronte a quel brusor.

S,ciopava i carpanoti

par tuto quel calor

spandendo tuto intorno

na spussa de brusà.

Na gran desolassion

xe tuto intorno al bosco.

Ghe xe un silensio strano,

ghe xe malinconia

parchè tuta la vita,

la xe brusá via

Francesco 2004