Tépela

A go pena saésto che anca Tépela l’é na vanti; come che se dise ala maniera alpina.

Un pugnasso nel stòmego: el gera vécio fa mi! 

E ze già el terso, dopo Maurissio e Claudio.

Ma mìa solo par cuélo..., anca parché a cuél toséto scarognà ze ligà i me ani pì bei.

Ricordi de co gìrimu ancòr bocéte e ghìvimu la vita davanti e in pugno, prunti a spacàre el mondo.

Dopo magari a ze sta el mondo a spacàrne naltri…, ma questa ze naltra storia.

A stàvinu tuti live alòra, in tra l’Ara e la Piassa: Fabio, Giuseppe, l’Annalisa, Adriano, ... e dopo Antonuccio, Loris, e i altri che se dontàva a seconda dele bande e dei momìnti.  Na vera tépa: la tépa dela piassa de cuéi ani sessanta. 

Na mànega de slondrùni senpre in volta a bàguli e mai sàssia de moti (almànco a dita dei veciòti sentà sui scalini de Nicola, che i ghin saéa senpre na pagina pì del libro).

Bepo el ze senpre sta un fià speciale, anca da bòcia. El gera un spin capeléto, mai fermo, ma con un’alegria libera e la ridàda contagiosa. El ga canbià diverse case in volta par el paese: dala Quinta, rente ale fontanéle dele scole e po ai Chéca, tacà me Nona, ma la so orbita la girava senpre torno a l’Ara, andòve che stava so pora Nona: la Marialvìra. 

Cuanto che la lo gà sercà in volta par el paese, cuéla pora veciòta, che nol gera mai rento casa. La girava de tondo, domandandoghe a tuti: “Ghìo visto el me Giusépe?” La lo ciamava senpre par longo: Giusépe, ma élo gera dei Tépele elòra lo ciamàvimu tuti Tépela (veramente luri saria sta Gànbari; la vecia Tépela gera so bisnòna, da Rosso). 
E Tépela el ze restà par senpre, anca se sul cuaderno de scola el ghea scrito: Giuseppe Ortolan.

Me sobàte ancora nele rece le nostre corse do par la Capéla, par i Trudi o par le Vegre, o sù par el Creàro; in braghéte curte e le ganbe tute piturà dai colùri dela tera e dai sgrafùni dele russe. I archi fati con le polghe de noselàro e i sbecamìnti ca se tiràvimu drìo parché ruinàvimu le frasche par i fasolàri. In volta a gnari e col corteléto in scarséla, senpre pronto par le mejo forsèle de orno par la fionda. E dopo dò da Canéla a tòrse i àstici, o da Catinòn a conprar le canéte dela luce par la cerbotàna. Cuante bisèrtole ca ghémo sisolà sule masiére dela Capéla, cuanti girini ca ciapàvimu nele posse dela Val del’Orco. Cuanti dispéti ala Giudìta. Cuanti pociamìnti ale fontanéle. Cuanti rassùni coi caretéi.

A no lo vedéa da tanti ani el Bepo, massa. Da lora lo gavarò incrosà si e no tre volte e de sbrìssio. Te lo tulìvi da distante; dal so caminare dindolànte, man in scarséla e la testa un fià piegà da na parte. El te saludàva senpre volentiéra,  el  paréa senpre contento. Ciao coscri, viva el ’61, el diséa senpre. E el se la ridéa. 
Lu el gera restà cuél che el gera. 

A so che cuando che el tornava in Paese, nol mancava mai de passare a saludàre i vivi, ... e anca i morti. A vardàre ancora i posti andòve che fursi el ghéva lassà i ani pì bei.

El ne ze passà rente, Bepo, incontentàndose fursi dela nostra comiserassiòn. Desso anca la Marialvira la gavarà finalmente rente el so Giusepe e la sarà in pace.

Ciao Bepo, fursi te catarè anca Gildo, nela nova Ara, andòve che zé fermo el tenpo e la vita pì no bastòna. El te gavarà parecià sens’altro una dele so favolose balestre, de cuéle che alòra el se faséa solo par lu e nol voleva mai darne.

Addio Giuseppe. Che ti sia finalmente lieve e materna la terra, come non ti è mai stata. Di te conserverò questo ricordo caro, fino a quando il tempo non saggerà anche la mia fortezza.

el to coscri Giani