El giorno zé drio rivare…
no zé pì scuro,
ma no zé gnancòra ciàro…
Me gusto in pien sto momento
parchè, da chi un fià,
sarà tuto sparìo…
In sta parte del mondo
el dì cominsìa come ogni matina...,
ma stamatina ghe zé qualcossa de difarénte…
Eco, pian pianélo, come na lampadina moderna,
riva el ciaro… e intorno a mi, meravéja sensa confronto!
Slùsega come brilanti le montagne intorno,
par che le me parle e che, pena svejà,
le me regàle na cartolina piturà de fresco,
la note passà …
Coverta bianca, sprussàda de farina, sùcaro a velo…
regalo vignù dal cielo..
E fin ca camino e me vardo intorno
el me core se impiéna,
se impiéna de robe ca no so spiegare…
robe che me juta a vardare con altri oci,
sto giorno che zé rivà
e che me domanda de vìvarlo in pien,
sensa pensare a ieri o a domàn…,
ma tegnéndo in mente
che ogni minuto ca vivo, zé sempre un regalo….
Lucia Marangoni
Nessun commento:
Posta un commento