El capitélo del diàule

Avvertenza per gli italofoni

Chi riesce a comprendere compiutamente il testo  in astìcano arcaico che segue, non necessita di particolari  avvertenze; si tratta di disquisizioni semiserie di argomento naturalistico e antropologico locale. Tuttavia è doveroso segnalare che il cimento è sconsigliato alle persone un po’ frittelle, a chi è nato nella bambagia, a chi ha la puzza sotto il naso, agli igienisti convinti che girano con l’amuchina, a coloro che  non sanno da dove vengono e a tutti quelli che, come diceva un mio amico, vengono e vangano e non sàpano dove vangano.

Drìo vér scrivésto dij capitéi dij santi, chij jóva ale ocorénse del’anima, me pararìa anca bòn contàr calcossa de altri capitéi, ... cuìli del diàule, che in volta pal paese i serviva ai bisogni del corpo; anca ìli, poricàn, i ghe ga dà liberassiòn e soliévo a tante generassion de cristiani.

Secapisse che no vorìa mìa mancar de creansa, ma gavarì zà tólto ca sto machinàndo drìo al  “césso”; on nome che desso el sóna desconsà, anca s’el gavarìa lustrissimo fòntego latìn in cuél locus secessum ch’el vol dire posto on fià sconto e in parte, cofà che ponto i jera stì gabiòti in óro ai luamàri.

Césso pò, sarìa sta ancor on parlar finéto, sa pensémo che i pì salbéghi i lo ciamàva “cagaóro”.

Stiàni le robe de natura, a parte el sesso,  se ciamàva dal bon col so nome.

Bagni, gabinéto, servissi, viccì e tualét, .. i ghéa ancor da rivàre.

El césso par solito el jera inpiantà sul cantòn dela póssa,  andóve che la marcansìa dij cristiani se missiàva a cuéla dele bestie, datosi che alora se tegnéa ben da conto tanto cuél che nàva rénto par darghe forsa a l'omo, de cuél che gh’in sortìva par dàrghela ala tera.

Ghe jera on gabinéto par ogni luamàro, contrà o maso; nissùni s’invelenàva se te ghe doparavi el césso de élo, posta che jera tuto oro pai canpi!

De cagaùri gh’in jera de tante sorte, drìo la creansa e la possibilità dele faméje. Cuìli pì bej i jera érti a muro e smaltà, co la porta de tole col caenasséto; quili de tolàme, i ghéa la porta de scorsi e magari scubià e con la naéja destciodà co on sogàto par tegnerlo sarà.

Rénto se catàva el buso par tera che dava in tela vasca del pisso e on caécio con inpirà cualche sìnsolo de pessa, carta da sùcaro o de gaséta sbregà par netàrse. 

Co le robe nava par le longhe e se ghéa  culo che l’articolo fusse intiéro, capitava anca de lésare cualche interessante notissia de l’ano vanti. Le brave mame, par riguardo dij culìti tèndri dij tusìti, le rincuràva al’ocorensa le cartine finéte e molesìne ch’ij inscartossàva le larànse; ma chìve nàvimu su roba de lusso ciò!
Par solito el césso jera pién de mosche, ragni e terejìne che le sluséa sule finestréle in sìma e col profumo de violéta che alora no se ghe badava mìa massa. Solo drìo ch’in paese jera rivà el ciménto, i céssi i ga tacà a modernarse: le péche rialsà andò podàre i pìe, cussìta jera manco fàssile pissarse in tele scarpe, diritùra el sentàcolo par no stàr de picolòn, le pendense giuste e i busìti par far scolare el pisso. 

Serti pò i ghéa on scoatélo tuto inpetolà e magàri on capelòto de tola col mànego par stropàre el buso. Par no dir de cuìli che ghéa tacà a métare diritura el vàter de seramica rénto al cagaòro, vanti de tirarselo in casa e far le robe comesideve. 
Sentire el stciafòn dela mercansìa petàr dò in tela vasca pò, jera la giusta riconpensa del sforso péna fato e el te dava cuéla sensassiòn de robe  a modo che desso se garìa struma a capirle.

Me nona parò, la ghéa el bruto vìssio de trar rénto in tela vasca el farléto dij cuniji e lora ciò, ... gnente ploffsssct....!!!

El césso el vegnéa bianchedà a calsìna ogni ano, cussìta se desinfetàva tuto e sconparìva anca le decorassiòn a sprusso, in tute le tinte del maròn e del zalo, che le incolorìva la parte bassa del barachìn.

Lora ciò somejava de farla in césa, ...ma mìa par massa!

In piassa ghe jera anca i céssi pùblici; co l’àcoa, i muri lustri, i cagaùri spartìe dai pisaùri; na roba de gran lusso ciò. I li ghéa fati sù dopo la prima guera, sbossàndo la rocia soto le stale dij Lussi, che parvìa de sta storia, ze sta i primi in paese chij ga bìo l’àcoa corìva in casa.

Lìve ciò ghe nava tuti cuìj che stava in l’Ara, che passàva in dò par la Capéla e massima la jente che fava capitélo in tele ostarìe dela piassa.

L’igéne alora, i ghéa ancor da inventarlo: carta no gh’in jera, foje menchemànco e capitava che biognasse rangiarse drìo estro e ocorensa.

Par ani se ga podésto vèdare su pai muri scrite maronsìne tipo: “M JUVE” o W MILAN.

E pò i ghéa anca corajo dire che se jera gnoranti e gnan boni scrìvare! 

Biòn capire che stiàni la confidensa co la merda la vegnéa anca naturale. Le bestie jera de casa, co tute le so robe. Ghe jera posse cuasi in ogni cantòn. Ale vache, che la sera se paràva a bévare ala fontana, a no ghe paréa vero de farla fòr dal socàle e le strade jera piene de boasse, chégale e pétole. Lora no jera mìa tuto sfaltà e bastava on slavàjo o cualche veciòta che le rincurasse par l’orto che tuto se rangiàva in pressa.

Stomeghìni pò, a no jìrimu gnancaparsògno: penséve ca navimu in tij cèssi pùblici drìo la césa; lìve  l’àcoa no la ghéa mìa forsa albisogno par ramenàre i petolòti pì grossi e lora naltri snebelùni se godìvimu a sponciàre i strunsi coi pìroli pijni de balistite ca rincuravimu dale casse de munisiòn dela Schwarzlose, residuato bèlico, che'l me poro nono ghèa inboscà soto le tole del bàito. Finìe cuéle, doparavimu le file de petardìti russi ca conpravimu dale Polàche; ma gnanca da métare!

Le esplosiòn jera un deghéjo de sghinse de merda che se stciafàva in volta dapartùto. A fàvimu conpagno anca co le boasse pì cagne e altre robe che chìve la sarìa longa contare. Drìo man a ghìvimu ciapà cussita tanta sata co le cariche ca gò idea ca sarissimu sta anca boni de far saltare el canpanile in pìe e farlo cascare drito rénto al portego dij slìsseghi, solo ca ghìssimu bìo pòlvare pì forte e manco vecia.

El gabinéto de casa nostra, vanti de rangiàrla, el jera zà a l’avanguardia: péna for dala porta che dava in corte e belo incassà in te na reséga del muro; el jera praticamente in casa, a solo uso de fameja e fato ben, dato che me pupà jera n’artista dela cassóla. 

Cuél de me nóna Gusta invesse el jera erto in tel cantòn de l’órto, sora la posséta, péna fora dala porta dela stala. El lo ghèa tirà su de muro già me poro nóno ma dopo lo ghèa rangià pulito me pupà con on bel sentàcolo a rebalsa de tole de pésso pionà e massima na porta che saràva bén. Proprio de lusso ciò! Dato chél jera sul strodo dele Fontanèle che menava al Ricreatorio, el jera però anca la tapa de cuìli che nava al cinema e passava par de lìve, liberandose dale do ore de costrissiòn. De sta costumànsa parò, me nóna no la ghéa mia massa caro; anca se jera na benedissiòn par l’orto, jera ancòr pì na struma tegnerlo néto da tuti i mastciamìnti.

Biòn anca saére, che co jera ora de bujàre la vasca, jera proprio on gran bruto mestiéro! 

Co se levava el stròpolo, co la ponta de na gràpa o del pìco, conpariva el fruto de tanti sforsi bélo fracà. Lora biognava rònparlo e cavarlo fora doprando on elméto crùco incioà in cào a on palo ... e se nava via col fià.  L'elméto ghéa par forsa da esar crùco, pavia che cuìli taliani i se sassinàva massa in pressa e no i ghéa mìa cuél bel frontìn ch’el paréa fato posta par l’ocorensa.

Cussita s’inpienava sìci, brenti, bandùni e dérli che i se portava in tij ùrti in Sima ala Fontana con na corvè de  passiòn: i màneghi de fero fin dei sìci e bandùni i te sisolàva le man, ...e guai a spàndare. Col bigòlo se sarìa nà mejo, ma par naltri boce el jera massa grévo. Del dèrlo pò, portà a spala con on saco da patate a parar la copa, …no gh’in parlemo! Se la strada jera longa, capitava che i baj,  .. e che baj,  rivàsse a nàrte fora in passejata sul colo: pudì majinarve la godùria! Jera pròpio on laòro de merda!

El cèsso de fóra parò, se doparava de jorno. Co jera scuro o massa frédo, i bisogni se li faséa rénto in casa. Sul socàle in stala o in tel’urinale o vaso da note: on bel cicaròn de seramica o de fero smaltà de bianco e col bordo bluéto, che se tegneva inboscà in tel buféto o soto el leto e la matina bonòra se nava bujàrlo de scondòn in tela possa o a trarlo dò pal césso, resentàndolo in pressa in tela róda. I pì bacàni i ghéa anca la còmoda: on gabiòto de pésso co na rebalsa col buso e la sécia scónta rénto. Par creansa la se scondéa drìo na coltrìna o la se coverdéa con na toajéta ricamà col centrìn e le saane, cussita se salvava anca le aparénse.   Lora se capisse anca che i ghesse inventà el dìto: "co la merda ga spussà na volta no la spussa altro"; a no podéa mìa éssar difarénte!

Ma no ghe jera mia sol ch’ij cèssi ciò: ghe jera ben tuto el mondo foravìa a disposissiòn; canpi, prà, róde, siese, buschi; ... altro che l’inbarasso de la sielta! Cuìsti i sarìa stà anca pì génici, dato ch’ij ghéa cuasi senpre anca el fabisogno par netàrse; sensa baj, mosche o altri castìghi datorno. La roba mejo jera le foje dij slavàssi, o pìedeòca, màssima cuéle picinìne, bele téndre e molesìne col peléto soto: le ghe fava on bafo al dopiovelo de desso!

Gianni Spagnolo