El tabàro

 

Camino sule strade dela vita

e porto un peso enorme…

Peso sule spale, peso sul core…

Me par quasi de avere sù un tabàro,

un pastràn, un paletò de quili de sti ani,

pesanti e duri, che te fa sentire inbachetà…

Xè tanta fadìga portare tuto sto peso,

serte volte par quasi ch’el voja schissàrme,

ch’el me fa stare tuta stènca, come un bacalà.

La testa se piega, le spale se incùcia,  i pìe i trabàla:

tuto el me corpo xè drio patìre, unìo ala me anima…

Ma, fra tute le caène che me tien streta,

provo a trovare qualcosa

che me jute a liberarme da quel tabàro

massa pesante par  levàrme da tera,

par sentirme mejo,

par far contento el me còre.

El  me tabaro l’è come l’inverno…

la bela stajòn la xè ancora distante,

sconta, difìssile da trovare,

ma lo so ben, che la xè lì che la speta

par dàrghe un fià de colore ala me vita.

Cusì mi speto e prego, 

spero che rive tenpi pì boni  de quisti…

Intanto provo a tirare xò el tabàro,

e anca se fasso fadìga a liberarme 

da quel’afano che me strenxe el core,

serco in tuti i modi, de consolare el me dolore…

Also la testa, tiro sù le spale, movo le gambe…

No xè come prima, no… no sarà pì come prima…

Ma ogni matina, la vita me ciama 

parchè mi gò da vìvarla…

E alora, me strassìno 

e con la forsa che me xè restà,

paro via le lagrime e… vivo!

     Lucia Marangoni

Pedescala 5 febbraio 2022