El sigolòto

Se spetàva un mese de l’ano preciso, e zera proprio quelo de giugno, quando scumissiàva i primi caldi, tempo del tàjo del fen zò nei pré de l’Astego e in giro par le rive e le vanéde.

Tuto zera proprio netà, no ghe zera na vanéda o riva che no fusse tajà l’erba, naturalmente con la false che la vegnéva batù con maestria, sentà su na caréga, magari soto un pòrtego o sentà in un prà, con in meso a le gambe la piàntola, na specie de ciodo de fero con la testa bela larga in modo da posarghe sora la lama dela false. El  martélo par bàtare la false el doveva avere la testa tonda par no macàre el filo dela lama, tacà ala sintùra dele braghe bisognava avere el coàro, un corno de vaca vòdo con dentro acqua e la pria par rifarghe el filo ala false.

Noaltri boce se nava in giro par le rive e le vanéde a sercàre nele piante de “orno” un raméto ch’el fusse el pì adàto par fare el sigolòto “fischietto”. Ghe ne zera tanti, ma trovare quelo giusto zera na bela impresa, o el zera massa grosso, o el gavéva massa gropi, o la scorsa zera rovinà, o el ramo zera massa fin, insomma rampegàndose e saltando masiére, finalmente la pianta giusta se la trovava. Zera deventà quasi un rito, un sercàre maniacale de sti ramìti, parchè tuto dipendeva dala scelta del miglior legno parchè el sòno del sigolòto el gavéva da éssare  come na melodia.

Insòma, trovà sto raméto o pì ramìti, se scumissiàva el laòro ch’el dovéa éssare fato a regola d’arte.

Intanto, bisognava tajàre soto el primo gropo che se trovava, dopo se lo tajàva dela lunghessa  giusta che zera tra un gropo e l’altro.

Se tajàva in testa esatamente soto el gropo sucessivo, sichè vegnéva fora un bachéto che da na estremità el gavéva un gropo.

Dala parte opòsta se ghe faséa dù tajìti par formare na pìcola pendoléta, cavà via questa, apéna de sora del gropo se incideva giusto  apéna apéna la scòrsa tuto torno la circonferensa. Dopo rivàva el momento magico, e qua bisognava avere na serta concentrassiòn par far vegnér fora un sigolòto doc.

Prima se metéva sto bachéto tra i lavri, bagnandolo ben col spùo, dirìa quasi abondantemente, dopo se ciapàva el cortélo par la lama con el deo grosso e l'indice, se metéva el bachéto sul denòcio e faséndolo girare vanti e indrìo par la so circonferensa se batéva con delicatessa con el mànego del cortélo sul bachéto cantando na cansòn magica:

“Can  can

 pétola de can

 pétola de osso 

fame vegnér fora 

un bel sigolòto”

cantà con concentrassiòn, senò la magia, che faséa sì che la scòrsa se stacàsse perfetamente intiéra dal legno, no la riusciva.

Dopo vari tentativi con ripetissiòn de la cansòn, come un rosario, se provava se la scòrsa se stacàva. A volte funsionava tuto ben, ma ne la magior parte del volte la scòrsa se rompéa par longo e lòra bisognava riscumissiàre tuto da capo con naltro toco de bachéto.

Quando che le robe però le nava ben, pian pianélo se sfilava el bachéto dala scòrsa tegnéndola sempre inumidìa de spùo che faséa da lubrificante, dopo, se tajàva via el tocatélo in sima dove che se gavéa tajà la pendoléta, se lo infilava a l’estremità de la scòrsa e dopo dal’altra parte se infilava el resto del bachéto.

Supiàndo con forsa a pieni pulmùni e movndo in sù e in dò el bachéto... eco che da quel toco de legno vegnéa fora na melodiosa  e magica musica con tonalità diverse a seconda de la posissiòn del stantufo.

Credo che la riuscita de la fabricassiòn del sigolòto la sia sempre stà dovùda, sì, a la cansòn magica, ma anca a la bravura nel cantarla.

Nico Sartori