La maronàra in sima la pontàra de Pedescala

 

Piova, neve, gelo o col tempo se s-ciàra

sempre al so posto sta la maronàra,

in sima ala pontàra  la vede  passare,

chi vanti e indrìo gà da nare...

Co xè inverno, la xè ratristà

le foie perse, la someja spaurà...

Se vien la neve, la cambia colore

la slùsega tuta, nel so candore!

Ma co vien primavera la xè tuta fiorìa

e mai de vardàrla me stufarìa…

Tuta de bianco la se veste de novo

da un dì a l’altro, più bela la trovo…

Guardando el cielo tuto ciaro

a tanti usei ela dà riparo…

e ai so pìe, sula panchina

par scoltar le ciàcole, quasi la se inchina...

De istà, a ogni ora cambia la gente,

de ogni età e par questo  difarènte…

i se senta xò un tocatèlo

e i discute de questo e de quelo...

Del tempo, dela gente, de chi che passa

de quel che sucede, lì ne la piassa…

Ogni persona che se trova a transitare,

da soto la maronàra, se sente saludare!

Co vien l’autuno, la dà  i so fruti 

 i xè mati, ma i vien xò tuti,

quanti tusìti ghè sta intorno,

i ghe scorla i rami, ogni dopo mesogiorno.

De quei maruni, gnente i ghìn fa,

ma i li tol su, in gran quantità,

i se gode, i passa qualche ora in compagnia

fin che anca la maronàra la xè… finìa.

Passa i ciclisti e i se ferma ala fontana lì tacà,

par tòre acqua fresca, a volontà,

prima de fare el Piovàn, soto el sole,

na sosta al fresco, proprio ghe vole!

E quando ghe xè el vento che i so rami fa scorlare

a volte quei più magri, li fa cascare…

in meso ale so foje, el sùpia forte

e par  quasi che  tante parole nela vale, el porte…

Passa i ani, cambia le stagiòn,

e la maronàra là la stà benòn,

no come quela volta che la gera malà,

e par salvarla i la gà punturà…

Mi te salùdo, pianta secolare,

chissà quante ancora, te tocarà passare,

mi te vardo sempre, quasi incantà,

de le piante intorno, te si ti, sua Maestà!

Lucia Marangoni

19 maggio 2021