Natale "strano"

 

Sto ano el Santo Banbinèlo

cata el mondo un fià canbià,

con Francesco, bon pastore,

ghe xe le piégore spaurà.

Le persone no se fida

e se vota a tuti i Santi,

pena che i se varda intorno

i vede busi...

ghin manca tanti.

La politica ghe juta

a fare tanta confusiòn,

stare a casa e nare a messa

solo con l'autorisassiòn.

Le botèghe se lamenta

parché gira poca gente:

el governo no le juta

e no se guadagna gnente”.

Chi che ga perso el laòro

e chi che pensa a fare spese,

chi che no pode nar a siàre

e chi che no riva a fine mese.

Da chi che core par i regài

o che pensa al cenòn,

a chi che ghe basta na minestra

par sentirse anca benòn.

Oramài tuti conossémo:

qualchedun de malà,

anca chi che xe xa guarìo

e chi no ghémo saludà.

La paura che t'ingropa

con el virus dentro casa,

i parenti xe foresti

e nessun che se basa.

Ma un filo de speransa

riva da Gesù Banbino,

pare proprio che a Nadale

el ne portarà el vacino.

23.12.2020 Dino Cisco