Potpourri

 

Quando la matina verzo i oci
ancora un fià indormensà
per prima cosa penso:
che belo, son ancora qua.

Ringrassio el cielo
e ringrassio la tera
guardando dala finestra
quanto la xé bela.

Gnente da dire,
son proprio fortunà
pensando ai poareti
a leto intubà.

Certo che la xè dura,
e nissuni lo nega,
star in casa a far gnente
par far vegner sera.

Sto virus maledeto
da distante l’è rivà.
Qualcuno el dise anca che i se lo gà inventà.

Ma al momento questo
nol conta gnente
parché desso bisogna
guarir la gente.

E come sempre
ghe xè chi che xè bravo a parlare
e chi invesse in silensio
se dà un gran da fare.

Da soto la pianta,
sento cantar i uselìti
e me ven da pensare
ai nostri pori tusìti.

Sarà nele case,
e che ogni matina
i se domanda quando
tuto tornarà come prima.

Anca se mì, ala fine de
sta “quarantena”
vojo sperare sia tuto
“mejo de prima”.

Anche se a dire el vero
go poca speransa,
ghe xè ancora in giro
tanta ignoransa.

Ma xè lo stesso,
el mondo el va vanti,
con la mascarina e
anca coi guanti.

E con un fià de retorica,
che a volte me amalia,
devo propio dire che xè belo
vivare in Italia.

Verranno tempi migliori,
è sempre stato così,
fasemosse però trovar pronti
quel dì.

E anche se al momento
me cresse solo la pansa
mi me porto el me cielo
dentro la stansa.

E quando ‘sto isolamento
crudele el finirà,
spero de ricordarme
de quanto son fortunà.