La colána de autùno
La stagiòn che vien vanti, la gà tanti coluri
ma nei prà non ghè xe più tanti fiuri..
Tuto intorno ne regala un splendore
che no xe bon a farlo, gnanca un pitòre!
Le foje su le piante le deventa rosse e giale
e quando che le casca, le someja farfale…
Vardàndo el monte che cambia ogni giorno
xe più belo, tuto d’intorno!
Ma ghe xe qualcosa che torna a fiorire
xe le bache rosse che porta colore,
e quando ca le vardo torno toseta
co navo nei prà, par man a me sorelèta…
Le pare le stelle che xe in cielo
le destàco dal ramo, pian pianelo
tute in fila co la gùcia le gò sbusà
e na bela colana me son preparà!
E ogni ano, tegnendola in man
el pensiero el va, proprio lontàn
quando che con poco se se godèva
e co na colana al colo, tuto cambiava!
Na gran regina te podevi deventare
o anca na signora da rispetare..
Con colane, bracialeti fati de fiuri
in un colpo de man, se deventava tuti siuri!
Xe vero, quei gera altri tempi
ma stando de fora se gera contenti,
e mi ogni volta ca gò ocasiòn
a vao fora, che me fa proprio benòn!
Lucia Marangoni (Dàmari)
30 ottobre 2026
Commenti
Posta un commento