Dala Paruchiera

 

Le done, co le va dala paruchiera

le parte de matina, le torna quasi la sera…

le gà sempre tanto da fare,

parchè ghe piase la testa cambiare!

Ghe xe chi che i caviji se stira

e col fon ben li tira..

Chi che i rissi col fero vole fare

e un tajo novo le gà da provare!

Chi che vole i colpi de sole lucicante

chi che col colore novo, deventa sgargiante...

Chi fa le mesh, de ogni tonalità 

e chi che domanda de esser rasà!

Le verse na rivista, le varda i modèi

che i sia de efèto e anca bei…

E intanto le lèngue se mete in funsiòn

e le mete tuto nel calieròn!

Le cominsia coi divi e i atòri del momento

le parla dei politici e anca del tempo…

Ma scomìnsia de qua e conta su de là

le ciacole deventa un gran varietà!

La suocera delicata, la sposa nervosa

chi che se lassa, chi che se sposa...

Chi se fa i corni e gà l’amante

chi va via de casa, tanto distante…

E dopo par i malani, le gà rimedi a non finire

ogni dona la gà la sua da dire…

E  le vacanse nei posti vissìn o lontan

e i pressi che cresse e xe incerto el domàn...

E intanto la tinta la gà ciapà

el tajo xe fato, la piega tirà…

Le mesch le fa la so bela figura

e i rissi se sa, che de più i dura!

E cussì ogni giorno co se va al SALONE

se parla e se scolta tante persone,

anca la paruchiera la dise la so opiniòn

ma la gà da star muta, come in confessiòn!

Ela, con tute la gà da stare

par poder ogni giorno lavorare,

nare dala paruchiera se se rilassa

e le ore in pressa, sempre le passa!

Fialete, shampi, balsami e trattaminti,

un massagio e la musica, xe tuti pì contenti

e co xe finìo  ogni apuntamento dela giornata

se paga el conto e se fissa n’altra data!

El luni però i caviji no se toca

se riposa la paruchiera e se sara la boca…

Sperando che rive ancora tanti clienti

e che tuti vae fora, felici e contenti!

Nare dala paruchiera xè sempre n’aventura

a volte se cambia parfìn la figura…

Ma come che disèva sempre me papà

na dona xe bela, co la testa ben postà!

Lucia Marangoni (Dàmari)

7/8/2026