La Cesa de Pedescala
e lo diso proprio col cuore contento,
parchè chi che vien rento da la me porta
de preghiere ghi nà sempre piena na sporta…
Mi son la cesa Parochiale
e anca se tanti ani fa, gero messa male
la gente de Pedescala se gà impegnà
e par farme sù de novo, la gà tanto laorà!
La guera, se sa, no la fa distinsiòn
la porta dapartuto nà gran distrussiòn…
La cesa col paese gera un mucio de sassi
de la gente, no se sentiva più gnaca i passi..
Ma quando dal profugato i xè tornà
disperati le rovine i gà vardà,
ma i se gà messo de bona lena
sù le màneghe e xò la schena…
Cusì pian pianelo son tornà al me splendore
grassie a tanta gente, tuti con bon còre
in tanti i se gà dà un gran da fare
par el Signore tra i me muri, ancora lodare!
E par ogni roba che dopo serviva
con fadiga e impegno la se comprava,
e chi che gavèva più possibilità,
qualcosa a la so cesa, gà senpre donà!
In 100 ani gò scoltà tanto…
dei me fedeli, anca el pianto,
orassiòn, canti, litanie e rosari
nei giorni feriali o in quei straordinari!
Al me fonte tanti, Cristiani xè deventà,
nel confessionale, i pecati xè stà contà
funerali, matrimoni, creseme e comuniòn
a gero piena de gente, in ogni ocasiòn!
E col turibolo, profumo de incenso ne le grandi feste
e senàre in quaresema, sparsa in tante teste…
Le S.S. Messe, e l’Ostensorio par l’adorassiòn
e col baldacchìn, par nàre in processiòn.
E quanti i preti che quà xè passà!
Quante prediche ca gò scoltà!
Spiegassiòn , richiami o suggerimenti
fin che in silensio, scoltàva i presenti!
E le statue co i nostri bei Santi
S.Antonio e S. Barbara, protege tuti quanti,
S. Giusepe, la Madona, S. Domenico e S. Caterina
ghè manda grassie a chi che devoto se inchina!
Quando i cambia le tovaje sui altari
e nei vasi i mete tanti bei fiuri,
quando i me nèta e me sento profumare
a diso grassie, sensa gnanca parlare…
A volte el silensio me fa sentire proprio sola,
ma ghè xè nà roba che me consola…
fin che ghè xè chi che me desciàva la porta
mi son contenta e altro nò me inporta!
Nà visita, nà candela e na preghiera
un fiore, un pensiero, de matina o de sera,
mi son sempre lì, a guardia del Signore
che ne invita tuti, sensa far rumore…
E quando ca sento el me organo sonàre
e la gente con gioia le lodi cantare,
a penso che anca se tanti ani xè passà
ghè xè ancora chi tra i me banchi, se indenociarà.
Col me canpanile, sempre a rente
che col sona se sente anca distante,
mi son par tuti un punto de riferimento,
se ferma anca i viandanti e i prega un momento!
E alora de novo vojo ringrassiàre
chi che ancò vien dentro a pregare,
chi che se dà da fare, ancora con passiòn
parchè in cesa ghè sia devossiòn!
100 ani i xè proprio tanti,
ma mi spero de ‘ndare ancora avanti
ma bisogna ricordare e tegnere presente
che un paese, sensa la so cesa, nol vale gnènte!
Lucia Marangoni (Dàmari)
Pedescala 20/06/ 2026
Commenti
Posta un commento