La castegna mata
Stamatina, son nà fora
a sercàre nà castegna mata
gò vardà che la sia grossa,
piata e anca malfata…
Quela che me pare la me vae più ben
parchè averla co mi, me convien!
La go messa in scarsèla, col fassoleto
desso che vien vanti el freschèto,
na volta i Noni diseva,
par cossa no savarìa
che ogni malano de l’inverno,
la pode portare via!
Na castegna mata,
la xè na gran medissìna
parchè no te serve gnanca la tachipirina…
El rafredore el resta ben distante
e par questo la xè cussì inportante!
Che sia vero o xè na storia de sti ani
mi provo a tegner lontan tuti i malani
ma sensa traversa no so dove inbusàrla…
a finirò de sicuro col desmentegàrla!
Lucia Marangoni (Dàmari)
15/10/2025
Commenti
Posta un commento