La Cesèta

Sconta nel verde sul monte Piovàn

la picola cesa se vede da lontàn,

nel milenovesento, in tanti gà laorà

sasso su sasso, con tanta bona volontà!

Par rèndare grassie al Signore

che’el se prega come nostro Redentore,

e ricordare  a tuta la gente

che Dio l’è sempre presente.

Da sto posto se domina de Pedescala el paese,

i canpi, i prà, i orti  e tute le case,

e vardando intorno, tra bosco e cielo,

se vede l’Astego, chieto e belo.

Co xè scuro, la se vede ben,

la xè iluminà come che convièn

e par Nadale la se veste a festa

imagà a vardàrla sempre se resta!

E nela festa del Redentore,

ogni ano la xè un splendore:

prima la vien ben netà

e dopo  coi fiuri la vien adornà!

Se taja  ben l’erba davanti

cussì che se ghe pode stare in tanti,

se neta  el strodo con cura,

par passare sensa nessuna paura…

In tanti se trova par scoltàre la Messa

stando de fora, no ghè xè mia prèssa…

Se prega e se ricorda chi che no ghe xe più,

ma che sempre ne varda da lassù!

I nostri  Avi  bisogna ringrassiàre

i ne gà dà un esempio da scoltàre…

Anca se desso i tempi xè difarenti

a sto ricordo i ne ciama par esser presenti!

Speremo che sta tradissiòn la vae vanti

che in stò giorno, 

ala Cesèta vegne sempre in tanti,

par stare insieme, 

ricordare e lodare el Signore

e  sempre  pregare Cristo Redentore!

                                                                              Lucia Marangoni (Dàmari)

Pedescala 20/07/2025