Festa dela Mama e non, a Forni

E anca st’ano magio xè rivà

e la festa de la mama xè sta organizà,

i Amici del Comitato i se ga dà da fare

e ogni roba ben preparare!

          I posti i xè stà prenotà in pressa:

         par el magnàre, le scenete e la messa;

         la Sara e la Samantha, la lista le gà terminà

         e qualche dona xè nà via stomegà!

In marso, tanto par cominsiare a pensare

qualcosa de divertente bisognava sercàre

e dopo aver vardà de qua e de là

qualche bona idea la se gà trovà!

           Ivo, tutofare, el se gà messo de impegno

          sega, guide, rue e tanto… legno!

          Ghè gà jutà anca Giovàni

          coi disegni e del lavoro i piani!

Dopo na sceneta se gà provà a ideare

e anca capire chi che la podèva fare,

la Lucia a scrivare le parti la gà provà

ma come sempre, tuta difarente la sarìa stà!

          Ghe mancava anca un paro de baleti, tanto par variare

          e le tose le gà provà a vardare...

          Dopo aver deciso e con vera passiòn

          ogni passo ai omeni, le gà insegnà proprio benòn!

Mancava un fondale colorato

e sempre le tose con colori, ago e filo le lo gà fato…

E dopo, sercare de preparare na bela loteria,

che contente la mama, la nona e la zia…

          Le musiche e le luci par completare,

          ghe pensa Daniele, lù el sa ben fare

          el gà trovà musiche e cansòn,

          el gà iluminà  ogni situassiòn!

              E le tole, con i fiuri e le candele,

              ogni volta difarenti, l’è xe proprio bele!

             El risultato de tanto lavoro, l’è ecelente

             in tola no manca mai gnente!

In cusina, sempre un gran da fare:

chi taja, chi missia, chi prova el magnàre!

Chi lava piati, bicèri e pignàte

chi serve con grassia tute le portate!

                     Ma stavolta el pì bel lavoro

                     xe stà el dolse, un gran capolavoro!

                     Le tose le se impegna e sempre in compagnia        

                     le lavora fin che la serata la xè finìa!

Parchè tuto sia perfeto,

ala fine, riva  anca un regalèto…

Le done porta a casa un ricordo de la serata

che la xe senpre bela e movimentata!

      La Festa de la Mama e non, xe tute ste robe quà

      ingredienti de ogni sorte, na bela varietà!

     Ogni volontario, col so savèr fare

     fa in modo che tuto possa funsionàre!

E dopo tuto sto gran movimento

i gà sempre el cuore contento!

Anca se la fadiga a volte xe tanta

la soddisfassiòn mai no la manca!

           Ai Amici del Comitato, aplausi a non finire,

           bravi tuti, gnente da dire!

           Ai omeni che con impegno gà balà,

           e a quei che da dona se gà trasformà…

Speremo de trovarse  ancora in compagnia

coi soliti ingredienti e tanta alegria!

Grassie a tute le done che gà deciso de partecipare

e insieme, sto giorno ben festegiare!

GRASSIE A TUTI, DE CUORE!

Sabato 10 maggio 2025                                                

Lucia Marangoni (Dàmari)