La polenta intel panaro

【Gianni Spagnolo © 21G23】

I lo dòpara senpre manco, el panaro, parvia che desso la polenta i te la menestra col scujero drita intel piato, fa le moose. Polenta deventà on sbrodego molesìn e sensa nervo, chel se sparpana in volta pal piato e nol sa da gnente; cuéla, carimìe, a no la xe mia la polenta mia. 

La polenta fata come che la ga da nare, cola farina grossa coi soentre, cota e missià intel caliero par tri quarti d’ora  almanco, che la pipe pulito, fin che cuel’odor fin de brustolìn se sparpane in volta par la casa, ciamando tuti a tola.

La polenta bujà sul panaro podà in medo ala tola, voltà de scato dal caliero, che la se sparpana pianpianelo fumando e scumissiando za a far la so grostiéla. Le coéte de bojo netà sujto col pieròn, cofà el bordo del caliero. Polenta dura, da tajar col filo da par soto na volta che la se ghéa sentà pulito, tegnesta in calda col canevasso. Polenta dala grosta fissa, cole fete che cuasi le stava in pìe da sole, mia cuela papeta molegata chei costuma desso. 

El panaro el jera l’altare dela polenta, el re dela cusina, picà via sul caécio rente la stua, belo comodo e senpre in vista. Fato de tola d'avesso, sensa gropi né rasa, cole vene sgrubà dai bruschetaminti. Fato drio la grandessa dela fameja, che ghe stesse tuta la polenta del caliero. 

Polenta bona anca freda, cola grosta grossa che la se destacava anca. Polenta bona anca bióta. Polenta col sucaro pai boce: primo, secondo e dolse; co no ghe jera altro. Polenta bona con tuto, massima cola fame, che la ze senpre el conpanadego pi bon.