La palanca

【Gianni Spagnolo © 21G23】

In tenpi de vache magre, de catùre e de schei chij val senpre manco, a me sojén la pìcola conomìa de co jérimu tusìti fondà sula palànca. La Palànca jera el nostro schéo! 

A voler far i petenèla, la monéda corìva de San Piéro sarìa stà el Franco; la palànca defàti la valéa ponto sento Franchi. La Lira invesse iera la valuta del'Italia, che la valéa istesso del Franco nostro e la jera anca fata conpagna (Sto chìve ciò, a zé on bàgolo che no a go mai capìo).

La palànca la jera el scheo che par solito i te prometéa i nóni co te conbinavi cualcossa de bon o anca i paesàni coi te fava fare cualche trapolada par ìli. Con na palànca alòra, a te pudìvi conprare na fràca de robe, ...presenpio:

• N. 5 Fiaschìti (da Narciso);
• N. 2 Scatole de mentine;
• N. 3 Scatole de anicìti;
• N. 2 Scatole de capéte par la pistola (solo dale Polàche);
• N. 1 Pugnale de legno (da Gildo, ..sel jera de bona luna);
• N. 4 Ghiacioj o pinguini pana e ciocolata (da Fulgido o a l’Apàlto);
• N. 3 Coni con do baléte paròmo (na baléta da vìnti e  una da diése, …el famoso cono da 30 de Fulgido);
• N. 20 Volte darghe da magnàre al'uxeleto dela musìna de Suor Coronata (sinque franchi al colpo);
• N. 4 Bustine de castagnacio (che a biognava magnarlo tuto sìti, par no ingosàrse);
• N. 2 Branchiele de stracaganasse o de bajiji;
• N. 2 Anilìti sul banchéto dela sagra el dì de San Piero (meda palanca a l’un);
• N. 1 Balòn da stgionfare al banchéto dela sagra;
• N. 2 Bilìjti dela pesca da San Piéro;
• N. 2 Cordéle de strocafisso, o 4 de pì curte, grosse e dure (da Matiùni);
• N. 4 Pevarini o 2 spumìlie.

Guadagnàrse cuatro palànche, parò, ... a no jera pargnente fàssile. Gnanca par sogno, ciò!

Se a no jera par la grassia dij nóni, par ciapàrse na palànca a ocoréva darse le man datórno a far dij laurìti o dele comissiòn; par solito jera i laùri pì insulsi, ... presenpio:

- Portàr su le legne in granaro: i jera dai 30 ai 50 cuintaj da menàr sù in trì o cuatro, co le séste o coi sachi che i te macàva i galuni o la schena, par tri piani de scale erte,  …lora i te dava diritura tré o cuatro palànche;

- Farghe la comissiòn ale veciòte che le fumàva de scondòn le Alfa da 80 franchi e le te lassava tegnérte el ventin de resto …posta che te tasìssi, secapìsse!

- Dato che alora el telefono ghéa le scarpe, …qualche veciòta la te mandava in volta de chìve e de lìve a nar dirghe o portarghe cualcossa a cualche comare, o in botega a provedare;

- Restelàre e far marélo;

- Nar fòr co le vache o la cavra (cuélo nol me despiaséa mìa);

- Menàr la cariola de luàme in tel canpo (ca se vergognavimu on pasto, màssima le tose);

- Nar tor la late in volta par fameje o al casélo col brentélo tute le sere;

- Portar via co la cariola la batarìa oltra ala vale (lora biognava essàr in dù, uno par branco; anca parvia che tornando indrìo a se viajava montà on fià paròmo; ...robe che invesse a no se podéa mìa fare co la cariola del luàme);

- Jutàrghe a cavàr patate, tirar do téghe o farle dò;

- Scorsàre le frasche e farghe la pónta;

- Cavàr pàvio (a la ghéa a fogo).

Desso na palànca, sa no sbàlio, la valarìa sinque sentesimi de Euro. Gnanca da sporcarse le màn co stì scheìti russi, ch'ij spussa anca. Vùtu metàre i nostri bei palancóti bei lustri? 

Nel 1965 on laorànte ciapàva pressopoco 80.000 Franchi al mese. On chilo de pan de Piona costava 150 Franchi. Lora el podéa conpràrse pì de 5 cuintàj de pan o 2.667 coni de jelato da na baléta e meda (cuij speciali de Fulgido), o sonò otosénto pugnài de legno (da Gildo). Al dì d’oncò on operaio el podarìa fursi conprase tanto pan conpagno de alora, ma poco pì che medi coni de jelato. Pò Gildo, ch’el ghe metéa na matìna a far dò on pugnale, a go idea che desso (posto che cualchedùn li sercasse) a nol te vendarìa mìa pì i 800 pugnài de alora, ...el se garìa fato gato anca élo ciò. Me jén da pensare che pal pan ancora a no gavarissìmu perso gnente, ma pai nostri bàgoli e i mistìjri de naltri boce, cari mìe, ...a stavimu altro che mejo alòra.