La palànca

In tenpi de vache magre, de catùre e de schei ch’ij val senpre manco, me sojén la pìcola conomìa de co jérimu tusìti, co le so gran certesse e stabilità:
una de stè chìve jera la Palànca!

La Palànca jera el nostro schéo in tij ani sincuanta e sessanta. 

A voler far i petenèla, la monéda corìva de San Piéro sarìa stà el Franco; la palànca defàti la valéa ponto diése Franchi.

La Lira invesse iera la valuta uficiale del'Italia, che la valéa cuanto el Franco nostro e la jera anca fata conpagna.
(sto chìve ciò zé on bàgolo che no go mìa capìo ben)

La palànca jera el scheo che de solito i te prometéa i Nóni co te conbinavi cualcossa de bon o anca i paesàni co i te fava fare cualche laoréto par ìli.

Con na desìna de palànche alòra, te pudìvi conprare na fràca de robe, ...presenpio:

N. 5 Fiaschìti de àcua e sùcaro incolorìa (da Narciso);

N. 2 Scatole de mentine;

N. 3 Scatole de anicìti;

N. 2 Scatole de capéte par la pistola (dale Polàche);

N. 1 Pugnale de legno (da Gildo, ..s'el jera de luna bona).

N. 4 Ghiacioj o pinguini pana e ciocolata (da Fulgido o a l’Apàlto);

N. 3 Coni con do baléte paròmo (na baléta da vìnti e  una da diése,…el famoso cono da 30 de Fulgido)

N. 20 Volte da magnàre ala musìna de Suor Coronata…

N. 4 Bustine de castagnacio (che biognava magnarlo sìti, par no ingosàrse)

N. 2 Brancà de stracaganasse o de bajiji;

N. 2 Anilìti sul banchéto dela sagra el dì de San Piéro (50 franchi a l’un)

N. 1 Balòn da stgionfare al banchéto dela sagra;

N. 2 Bilìjti dela pesca da San Piéro;

N. 2 Cordéle de strocafisso, o 4 de pì curte, grosse e dure (da Matiùni)

N. 4 Pevarini o 2 spumìlie.

Guadagnàrse cuatro palànche, parò, ... a no jera gnente fàssile.
Gnanca par sogno!

Se no jera par la grassia dij Nóni, par ciapàrse na palànca ocoréva darse le man datórno a far dij laurìti o dele comissiòn; solitamente jera i laùri pì insulsi e strùnsi, ...presenpio:

- Portàr su le legne in granaro: i jera dai 30 ai 50 cuintaj da menàr sù in trì o cuatro, co le séste o coi sachi che macàva la schéna, par tri piani de scale érte,  …lora i te dava diritùra trénta o cuàranta palànche;

- Farghe la comissiòn ale veciòte che fumàva de scondòn le Alfa da 80 franchi e le te lassava tegnérte le dò palànche de resto …posta che te tasìssi, secapìsse!

- Dato che alora el telefono ghéa le scarpe, …qualche veciòta la te mandava in volta de chìve e de lìve a nar dirghe o portarghe cualcossa a cualche comare, o in botega a provédare;

- Restelàre e far marélo;

- Nar fòr co le vache o la cavra (cuélo nol me despiaséa mìa);

- Menàr la cariola de luàme in tel canpo (ca se vergognavimu on pasto, màssima le tose);

- Nar tor la late in volta par fameje o al casélo col brentélo tute le sere;

- Portar via co la cariola la batarìa oltra ala vale (lora biognava essàr in dù, uno par branco; anca parvia che tornando indrìo se viajava montà on fià paròmo; ...robe che no se podéa mìa fare co la cariola del luàme);

- Jutàrghe a cavàr patate, tirar do téghe o farle dò;
- Scorsàre le frasche e farghe la pónta;
- Cavàr pàvio (a la gavéa a fogo).

......

Desso na palànca, sa no sbàlio, valarìa 0,516 sentesimi de Euro. Gnanca da sporcarse le màn co stì scheìti russi, ch'ij spussa anca. Vùtu metàre i nostri bei palancóti!

Nel ’65 on laorànte ciapàva a l'incirca 80.000 Franchi al mese. On chilo de pan de Pióna costava 150 Franchi.

Lora el podéa conpràrse pì de 5 cuintàj de pan o 2.667 coni de jelato da na baléta e méda (cuij speciali de Fulgido), o sonò otosénto pugnài de legno (da Gildo).

Al dì d’oncò on operaio el podarìa conprase tanto pan conpagno de alora, ma poco pì che medi coni de jelato.
Pò Gildo, ch’el ghe metéa na matìna a far dò on pugnale, a go idea che desso (posto che cualchedùn li sercasse) nol te vendarìa mìa pì i 800 pugnài de alora, ...el se garìa fato gato anca élo ciò.

Me jén da pensare che pal pan ancora no gavarissìmu perso gnente, ma pai nostri bàgoli e i mistìjri de naltri boce, cari mìe, ...a stavimu altro che mejo alòra.

Gianni Spagnolo