Sòfego

 

In sti giorni de sòfego e calura

in ogni parte se serca la frescura…

Se sta a l’ombra o col ventilatore

sperando che passe presto sto gran calore!

Par idratarse, se beve tanto

se magna legero, anca de manco,

se se veste poco, par no suàre

e col ventalio se prova a arieggare!

Mi dopo na giornata de vero inferno

a vo in serca de un fià de... inverno…

Verso sera vao a rinfrescarme

e dentro l’Astego volarìa butarme!

Ma farlo davero el corajo me manca

e alora vao solo coi pìe, giusto na s-cianta

camino pian tra i sassi che me convien

‘nte l’acua giassà, sto subito ben!

E intanto me vardo intorno

ormai xè finio n’altro caldo giorno

e spero che el doman che rivarà

un fià de fresco me portarà!

Lucia Marangoni (Dàmari)

30 giugno 2026