Spignatare

Fin ca son drio spignatàre, 

penso e me vien sta ispirassiòn…

Far da magnàre

Ghe xe chi che se dà sempre da fare

par far ben da magnàre,

pensando a uno o a l’altro de la famèja

i piati vien fora na meravèja!

Far da magnàre deventa quasi na preghiera

che no se dise de matina o de sera,

ma quando che se xe drio trisàre

de quela roba che se gà, 

semo drio ringrassiare!

E missiando e girando sora el fogo

ogni volta se fa qualcosa de novo…

parchè co se mete la passiòn,

ogni ricèta la sorte proprio benòn!

Quando el profumo impiena la cusìna

che sia un dolse o na fritatìna,

chi lo sente no gà più creansa

e con gusto el se inpiena la pansa!

Coi oci la se varda e dopo dentro al palato

se gusta e te la mandi xò par el gargato...

tuto el corpo el trova piassère

e anca co la mente el pode godere!

Far da magnare xè proprio na sodisfassiòn

se no se vansa gnanca un bocòn,

e co se vede la tola piena de gente

la fadiga, proprio no la se sente!

A tute le coghe che gira, missia e impasta,

a quele che sbate o che tira la pasta,

bisogna dirghe grassie, parchè col so lavorare

le  mete nei piati tanta passion e amore!

Quando la pansa xè piena, tuti lo sa

che ogni roba, mejo la va…

E alora xe mejo de gusto magnàre

e chi che lo prepara, sempre lodare!

Che sia omo o dona, poco importa

che sia na pasta, na carne o na torta,

l’importante xe fare onore a ogni pietansa

e sperare che par i altri che riva, 

qualcosa se… vansa!

Lucia Marangoni (Dàmari)

24/01/2025