La note dele Palme

A ghì da saére tusi, che stiàni i jera brai da bàgolo fursi pì de desso; se anca la vita jera pì grama, la jente catàva istesso ocasiòn de straviarse. Alora se costumava ancora de far schersi e dispeti la note dele Palme, tral sabo e la domenega vanti Pascua.  Se toléa de berta la jente, massima cuìli che ai bàgoli ghe stava poco e che co la ghe capitava ghe tocava incartarsela fando sìto. Se tratava de portar via robe dal so posto de maniera che la domenega matina i parùni del roba cibuscà i ghésse bìo da danarse a  nar in volta a rancurarla. A jera da goderse on pasto a darghe mente e sti chìve, tuta jente seria e contrìa, a girare pal paese in serca dela so roba.

Bepi Struca el stava benòn de casa, el ghéa na bela botega davanti al’Asilo andove che se podéa provedere de tuto: roba da magnare, da cusire e anca da trapolare. El laoro nol ghe mancava mìa e gnanca nol ghéa fredo, ma el so orgolio a  jera cuéle sinque piantà de canpagna chel goernava sora ai Cogulìti dela Pontara nova. Tanto par capirse, dale parte andove che ani dopo i garìa fabricà la caserma dij carbinijri e le scole medie.
Jera on bel tocasso de tera, comodo,  ben messo e bon da tuto.  Struca nol gera mìa on tipo tanto molesìn, col se metéa el saéa essare rùspio e sacranòn. Ghìn sa copia el poro Bepìn Pierassa che da bocéta, par verghe robà on pèrsego,  el se lo ga visto capitare in cusìna da so opà a pretendere chel ghe lo pagasse inmediato. 
Majinarse, con on tipo conpagno, se no ghe jera cuìli che no spetava altro che trarlo a siménto.

Do In tele so piantà, el vecio  Struca el se ghéa fabricà on bel cesso de tole, tutouno con on un bancaleto soto chel jera podà parsora el cantòn dela possa. Saéndo che i bociasse ghe tendéa ai so frutari, el ghéa ciapà el léco de sconderse intel cesso par darghe bada;  defàti jera sta ponto cusìta che cuéla volta el ghéa brincà cuélo dal persego. Cuel dì dela vigilia del Palme, Bepi el ghèa na gran pìtima che i che fasse cualche dispeto, massima i coscriti pena tornà dala visita militare e chel vedéa nar in volta a lolòn co l’ocio par aria e col céfo da sbregamandati.

Ma i coscriti ghéa già ben machinà la mossa; la sera prima defàti, sensa chel s’inacordesse, i jera nà a studiar ben el cagaoro, cussita da podérlo alsare gualivi e portarlo via in pressa podandoghe soto du branchi.
Cuel sabo dele Palme Struca el  lo ghéa passà in tei so canpi a destrigare ben la so roba de maniera che noi podesse portarghe via gnente, ma cuéla sera el ghéa bìo da narghe drio a serti so mistijri e nol podéa mìa star live a ténderghe ai bontenpùni. Ma nol jera mia chiéto. Lora el se ghéa ben pensà de ciamare so déndre, l’Ometo de oro, posta che ghe tendesse ala roba. Eco lora che L’Ometo de oro,  senpre pronto par ogni comanda, el se ghéa ridoto a inboscarse in cuél bujigàtolo par narghe drìo ale péche de so missiére.

Jera cuasi in gual note, tanto che l'Ometo sejtava arpisolarse, cuando che, dal strodo rente l'Angela Tolda, riva on stciapo de coscriti, che vanti i se ghéa ben sicurà che Struca el fusse distante. Ecoli ch'ijnpìra svelti du branchi de orno soto al barachìn, ij ghe fa torno on sogàto a stangolacàn par tegnerlo fermo, ij alsa de boto el cesso in cuatro e i taca a  scapar fora pal strodo medi incucià sui branchi co sto casseloto chel scorlava de cuà e de là che cuasi se rabaltava tuto. Chel cagaoro pesasse tanto cusìta, i coscriti noi ghéa fato mia conto ciò, ma cuando che l’Ometo de oro, passà el primo momento de oca, el ga tacà sbecàre che i lo mole do e che si ghéa voia de moche almanco i lo lassasse sortire, i ga sujto capìo el bagolo. Lora i ga messo par tera el barachìn e liberà l’Ometo stratolto, lassandolo nar casa, ma fàndolo jurare de far sito con tuti.

La matina drìo, el poro Struca el se ghéa catà la sorpresa e sujto el se ghéa messo a sercare el so cesso, tuto roàn dala rabia e con on diàolo par cavejo. 

Biòn dire che diversi paesani se ghéa già premurà de farghe saére, intra un meso sorizeto e dandose de gùmio, andove che ghe paréa fursi d'aver visto la so pressiosa roba e che i no se dava réchie come chel ghésse podésto rivàre fin laòltra.

Gianni Spagnolo