‘Ndare a foja

Me ricordo co gero na scolarèta

finìa la scola, magnàvo in freta,

e me inviavo, sensa tanta voja,

su par el viale, par spassare la foja.

Mi e me sorèla, tirando el carèto

metìvino unite le foje, par far leto,

bisognava far presto a imuciàrle

parchè altri podèva rancuràrle.

Dopo, fati in pressa i muci  che s-ciocàva

nei sachi tute le se ingrumàva,

nel caretèlo se caricava con atensiòn

e contente a casa se tornava a far la lesiòn!

          

E sto lavoro, ogni giorno el gera sempre quelo,

spassar foje  fin chel tempo fasèa belo...

solo se pioveva no se podeva ‘ndare

e che fusse  suto, bisognava spetare…

El viale gera sempre belo neto, 

tante le vache che gavèva bisogno del leto,

invesse desso la foja xè tuta par tera

e nessuni a spassarla se dispera!

Nel me paese no ghe xè più stale

tuta la foja par tera, la va de male…

ma vardàre la strada co sto tapeto colorà

la xè cusì bela, che me manca el fià!

Parchè tuti possa tegnere presente

che la foja la gera tanto importante,

de scrivarlo a gò  ben pensà

parchè no sia mai desmentegà!

Lucia Marangoni - Dàmari

13 ottobre 2025