L'angolo della Poesia

La valìsa de cartòn

Fra tanti strafanti,  gero sora l’armàro,

ma un dì, gò visto un fià de ciaro…

de quatro strasse i me ga inpienà

e par el mànego i me gà ciapà!

 Xè cominsià un viajo longo, longo,

gero in meso ale gambe, dela corriera in fondo..

E dopo in treno i me gà butà

me domandavo… “Dove i me portarà?”

Ma un giorno, dopo tanto girare

in te na nave gò dovesto montàre,

un trabalamento mai sentìo…

me pareva de ‘ndare, vanti e indrìo…

De giorno, de note, par  tanti dì,

mi el me paròn, semo sta cussì,

quando finalmente semo sbarcà,

me pareva de èssare tuta sacagnà..

Ma no la gera mia finìa

contarla tuta, no se podarìa,

ancora strada, ancora de viajo,

fra òmeni i se vardàva e i se dava coràjo…

Con un spago i me gavèva ligà

parchè no stavo mia sarà,

e quando che i lo ga tirà via,

la me aventura la gera finìa!

Quela del me paròn cominsiàva,

ala fameja lu sempre pensava,

ma par guadagnarse el bocòn

el gà dovesto partire, 

con nà valisa de cartòn!

Lucia Marangoni Damari