Sércame
fra le tòfe de tera
o tra i sassi de la masiera
in meso le foie che s-cioca
o soto le ale de la cioca
sconta in te i fassinari
o incatijà in te i rosari.
Vien,
mi ghe son
in meso le file de le sucare
o in te la panocia da scaolare
da drio el vecio lavandaro
o a setenbre su par el figaro
soto le bronse del buièlo
o rento el gnaro de calche osèlo.
Sércame,
fra i ani tondi de la saresara
o in meso le raise de 'a tajara
sconta soto i marei de fen
o incaenà in sta rima che no me vien
rento i rissi de le castegnare
o quando dal celo taca falivare.
Vien,
mi ghe son
nel profumo del calicanto
o quando i to oci xe nel pianto
in te l'odore de l'erba maresina
o co te ghe paura che vegna matina
in tel fredo fià del vento
o quando el to core xe contento.
Sércame,
mi ghe son,
in te sta bela Vale de confin
quando la note xe scura 'fa 'l camin.
El Pasubio cunàndome el me indormessa
i so brassi par mi i xe na caressa,
ma se te tardìghi su par le stradele
no darte pena, sèrcame pure fra le
stéle.
Irma Lovato Serena
Nessun commento:
Posta un commento