Contrà sperdute

“Contrà nel bosco" 
primavera 2011  

Gera matina presto, co son rivà

un strodo un fià erto, quà me gà portà,

intorno a mi solo bosco, primule e viole

che spunta anca’ndò che no riva el sole.

Coi sassi a seco xè fate le masiere

coverte dal mus-cio, bele , drite, fiere...

xè restà i sassi de qualche costrussion

fursi na casa, na baita, un casòn!

Na volta sto posto el gera abità

tre, quatro case, na bela contrà,

distante dala Vale e dal paese

quà se campava, sensa pretese…

Me imagino el sole che scalda i muri

de gente che lavora, se sente i rumuri…

“Bondì Paron!” “Saludo Parona”!

se va al posso, cusì qua funsiona!

El posso lo trovo, l’è poco lontan...

quanta l’acqua tirà sù co le man…

a quanti  cristiani la sen ghè xè passà

desso l'è scuro, sporco, desmentegà…

Cascà i coverti, se vede el cielo,

in cusina, piante col gnaro de un usélo…

solo el stampo de porte e balcùni

qua, da tanto non vien pì nissùni…

Me sento e vardo... che disperassiòn!

i oci se bagna, me vien el magòn…

un toco de storia, qua intorno xè passà

chissà se qualcheduni, me la contarà?

Ma sento el respiro, le parole del vento

che qua le conta, in ogni momento,

passando  fra i muri, fra i sassi cavà

a sento la vòsse de sta vecia contrà…

“Scrivi Lucia, tegni in memoria

senò nissùni conosse la storia

scrivi do righe, date da fare….”

Ecco, le gò scrite,
               par mai … desmentegare!    

Lucia Marangoni           

l'antico pozzo nella Contrà "i Casoni" sopra Valpegara-Lucconi