Rasse nostràne

Vanti che i sparisse dal tuto, sarìa ben rancuràre i soranóme dele faméje de San Piero e métarli par scrito. In fondo zé sempre redità nostra, che la ne gà conpagnà par un bon tóco de strada.

No zé mia fàssile sahìo, dato che de soranóme ghi némo on destermìnio, ma bión distinguere cuìli de faméja da cuìli  fibià solo al cristiàn e che pò no i se tramanda.

(De cuìli semo drìo conpilare n’altra  lista, … lora ghe sarà anca da rìdare!).

Par desso fémo sù i soranùmi de faméja, cuìli che i zé passà anca ai fiùi, o che i serve (o mejo, i ga servésto) par distinguere le varie rame coi cognome conpagni drìo el secolo péna passà. La pì parte i zé doparà anca al plurale o al femminile, chìve parò li ghémo tegnù al singolare maschile par no incatijàrse massa.

Cualche soranóme el zé ben vecio e gnanca pì doparà, altri i zé pì conosìsti. Se capìsse che tórghe la volta dipende anca dal’età; chi che zé pì stajonà vutu che no i se ricorde de tuti e fursi de cualchedùn che chive no ghemo gnanca ciapà. I pì dóvane magari i ne conpatirà.

Lora zé l’ocasión bona par domandarve na man a far le robe pulìto e sensa desmentegàr nissùni.  

Vardè ben  de ociàre la lista e segnalarghe ala Redassión del Blog tute le dónte e le variassión che pensé che ghe vója.

Ste chiéti che qua resta tuto in faméja; no ghe disémo gnente a l’Erario, casomai ghissi paura che ghe salte el bào de tassare anca i soranùmi. Sperémo invésse che no ne lesa el Sindaco, …che no ghe vegne la pensata de picàrne su l’IMS (Imposta Municipale Soprannome).

A San Piero sarìa anca on sistema fàssile de tirar su schéi!

Riga	Cognome	Soranòme de Fameja (In neretto cuìli originari e/o i pì veci)
1	ALESSI	Camilòto, Magnéi.
2	BONIFACI	Bàisse, Cassógno, Marco, Narcisi.
3	DAL POZZO	Furlàni, (Fóler).
4	FONTANA	Fùcari, Canpanàro, Galo, Gioca, Otàvio, Pìci
5	GIACOMELLI	Mori
6	GIANESINI	Marióto, Garbàto, Chechìti, Francìsi.
7	LORENZI	Boràna, Canéla, Carnavàle, Mondini (Avocàti), Barón, Capo, Culàta,  Marcantógno, Satéla.
8	LUCCA	Menónce, Boti, Belània, Carolìni, Danéla, Lighéta, Lijo, Mardemìn.
9	MUNARI	Morìti (Castégna), Pieretéla.
10	NICOLUSSI	Muz, Mistro, Galéno.
11	PESAVENTO	Crosàto, Bagarìa.
12	PIEROTTO	Gada, Barbéta, Conte.
13	PRETTO	Galìna, Scarpàro, Valente.
14	SARTORI	Menegànte, Bastòn, Minài, Pológno, Toto, Vico.
15	SELLA	Munàri, Segàti.
16	SERAFINI	Menegósto, Coa, Meneghéto.
17	SLAVIERO	Fodàto, Mosca, Toldùni.
18	SPAGNOLO	Paregìn, Nando, Daniele, Fabrélo, Ghìa, Lusso, Passéto.
19	STEFANI	Merlo, Merléto
20	TOLDO	Contesso, Godi, Màule, Pàmele (Gànbaro/Tépela), Redùlfi, Récia,   Toldìn, Africàn, Betéle, Baga, Cana, Ganba, Giassa, Maróla, Nicola,  Oio, Pieràssa, Pierobélo, Polàco, Spaca, Stciantìso (Badón),  Scarànfo, Sàuro, Tràco.

Dele Fameje: Bonato, Carraro, Fondase e Righele, no ghémo notissia de soranome fibìà ale diferente rame.
Bión ca ringrassiemo Giani de l’Argenta, nostro aiutante dala Vallonia, ch’el se gà tólto la briga de ruscàre tra i ricordi e butàr do la prima sbossa. Come ca vedì stémo trapelàndo a livélo internassionàle, con inviati in ogni cantón del mondo.

Gianni Spagnolo