CAMPANE E BATòCI
Batòci che sona, sensa stracàrse,
ora dopo ora, continua a zontàrse...
ala matìna, co vien el novo giorno,
el Padre Nostro rintòca tuto intorno...
e quando che pian pian riva la sera
l’ora de note, soméja quasi na preghiera...
In tuta la Vale le campane le ze tante,
a volte le sentémo vissìn , a volte pì distante…
se l’aria la tira in zò e la lo consénte,
savémo le robe de tanta altra gente…
Tonesa, Conca, Furni o Pedescala,
quanta musica, che concerti le ne regàla...
Nei giorni de festa, le sona in compagnia,
sentirle le dà, tanta alegria...
le ciama la gente, le sa avisàre
se ghe ze qualcosa che se gà da savére...
se del sono no se conosse la motivasiòn,
se va in piassa, a domandare informasiòn...
L’Ave Maria par chi che el mondo gà lassà,
de augurio par chi che se gà maridà...
e quando che nasse na nova vita,
sona le campane, con gioia infinita...
Se ghe ze messa, dottrina o processiòn,
le ciama la gente da ogni canton...
Un tempo le gera na roba importante
gnente orologi e la povera gente,
col sono dele campane la se regolava
matina, mesodì e sera, l’orario le dava...
i batoci , coi sogàti gera tirà,
dai campanari, con le man tute fruà...
Semo talmente bituà, che no ghe bademo,
ma se le ze morte, alora sì ca se acorsemo...
Sensa el sono dei batòci, ze quasi un dolore,
le campane che sona, le dà pì calore...
Le spande la voce, le se fa sentire,
pensemo a quanto che le pode ancor dire...
Però ghe ze anca chi che le volarìa stropàre,
i gà le rece delicate, i gà bisogno de riposare…
i dise che quel sono ghe fa s-ciopàr la testa,
magari le fusse mute...almanco de festa…
Ma le campane da sempre le gà sonà,
coi sogàti o elétriche, mai no le se stufarà...
“Sonè, sonè campane, batì forte i batòci,
musica par le rece e gioia par i oci”...
Lucia Marangoni
Nessun commento:
Posta un commento