Bronsescoverte compie oggi 13 anni!

 

Oggi il Blog compie 13 anni e ecco la Poesia dedicatagli dalla Lucia😊

Dopo ani de notissie, poesie e curiosità

dala Vale o trovà qua e là,

gera deventà un apuntamento

fermarse e vardare, un momento!

             La notissia xè rivà a l’inproviso

            la Carla e Giani gavèva xà deciso

           che el BLOG se gàvarìa fermà

           parchè le BRONSE se gàveva smorsà!

Par tuti xè stà un dispiassère

e coi mesagi se gà provà a capire,

se par sto fogo, inpissà con passiòn

 se podèva ancora trovare nà solussiòn…

          Tanta gente se disperava, pensando,

          che la matina, el cafè gustando,

         noi gavarìa più savèsto gnente

        de la Vale e de la so gente!

Ma i gera decisi, i du fradei

e rispondendo a questi e a quei…

I ga dito che no ghè gera gnente da fare

anca se su le BRONSE se provava a supiàre!

               I giorni in pressa i xè passà

              e non se savèva nissuna novità,

             né chi che nassèva o che gera ndà via…

             e tuti gavèva nà gran malinconia!

Ma par sto motivo se gà capìo

quanta gente che ghè nava drio…

Anca se nessuni gavarìa  mai imaginà

quanto sto BLOG el sarìa mancà!

       In ogni paese, in ogni via

      el fasèva tanta conpagnia…

     Cusì tuti gà ciapà corajo

     par mandare qualche mesagio!

La Carla  la ghè gà ben pensà

e con Giani la se gà confrontà,

vardàndo ben, la gà capìo

che la doveva fare marcia indrio!

      I misi xè passà, sensa BRONSESCOVERTE

      ma un bel giorno, con parole incerte…

      I gà scrito che fursi el fogo tornava

      e le BRONSE ancora le ardèva!

 E finalmente xè rivà el giorno

 che del Blog ghè xè stà el ritorno,

 tuti contenti i lo gà aplaudio

  parchè sto periodo vòdo, el gera finio!

         Grassie a sto ripensamento

         a tanti el cuore, gà fato contento…

          E se pol dire, con tuta onestà

         che sto bel fogo, el stà ben inpisà!

  Grassie Carla! Grassie Giani!

  Ve lo dise da l’estero e anca i paesani,

   l’augurio che se  podèmo fare

  xè impegnarse tuti a….. supiàre!

          Ma nà roba volarìa dire e xè el me pensiero…

         i ANONIMI i lasse stare, ma par davero!

        Se qualcosa da  dire ghè sarà

        farlo savere col nome, in tuta onestà!

 E ricordarse  che chi par sto BlOG se impegna

nol gà bisogno de nessuna magagna…

Ogni tanto  un grassie co un comento

farìa  de sicuro l’animo più contento!

           Parchè, a sto mondo gnènte xè scontà

          ancò ghè sèmo e doman …chi sà?

         Quindi xè mejo  ciapàre quelo che vien

         sensa tanto rabiarse, che no convièn!

 El me augurio,par sto bel ritorno

 xè de sercàre tuti, ogni giorno,

 con le picole robe che la vita né dà

 de vivere in armonia e serenità!

                                                       

  Lucia Marangoni (Dàmari)                  

  8/2/2026